O Pereiro de Aguiar celebra o 25 de outubro unha xornada micolóxica para coñecer o mundo dos cogomelos
O Pereiro de Aguiar será o escenario, o vindeiro domingo 25 de outubro, dunha xornada dedicada ao mundo dos cogomelos, pensada para quen queira iniciarse na súa identificación e recolección da man de especialistas. A cita desenvolverase na parroquia de Santa Baia en horario de 10.00 a 19.00 horas.
A proposta, bautizada como 'Cestas e ao bosque!', intégrase dentro do programa 'Experiencias Outono 2026: a caída da folla', un ciclo de actividades ao aire libre que se estende entre o 17 de outubro e o 8 de novembro e que percorre distintos puntos da comarca para poñer en valor o patrimonio natural da zona na tempada outonal.
A xornada combinará unha parte formativa, cun taller de micoloxía no que se explicarán as claves para recoñecer distintas especies, cunha saída práctica ao monte. Durante esa ruta, os participantes poderán buscar e aprender a diferenciar exemplares de xéneros como as macrolepiotas, os lactarius ou os boletus, entre outros.
O programa non se limita á parte técnica, xa que tamén contempla momentos de convivencia e degustación gastronómica: está previsto un pequeno petisco, un xantar con produtos da zona e a entrega dunha navalla e unha miniguía de cogomelos a cada participante. Ademais, realizarase un sorteo de agasallos entre os asistentes.
A actividade ten un custo de 15 euros por persoa e as prazas son limitadas, polo que a organización recomenda formalizar a inscrición con antelación. As reservas poden tramitarse a través da web turismo.ribeirasacra.org, por correo electrónico en turismo@ribeirasacra.org ou chamando ao teléfono 638 823 592.
Esta iniciativa está impulsada polo Consorcio de Turismo Ribeira Sacra, coa colaboración da Xunta de Galicia, Galicia Calidade e Xacobeo 2027.