A Asociación de Comerciantes e Empresarios de Maceda selecciona aos gañadores do V Concurso de Mecos
A Asociación de Comerciantes e Empresarios de Maceda fixo público o resultado das votacións do V Concurso de Mecos do Entroido Maceda 2026, no que participaron un total de 121 persoas. O reparto de puntos nas distintas categorías realizouse conforme ás táboas difundidas pola organización.
Na categoría de meco máis elaborado, o primeiro premio foi para “A Granxa vai de Entroido”, realizado polos usuarios e usuarias do Centro de Día de Maceda, que acadou un total de 493 puntos. Pola súa banda, na categoría de meco máis entroideiro resultou gañadora “A Meca Liberdade”, elaborada polo Centro Sociocomunitario de Maceda, con 316 puntos.
O premio na categoría de meco de grupos recaeu no Meco do IES San Mamede, que sumou 208 puntos.
Desde a organización trasladaron os parabéns ás persoas premiadas e agradeceron a implicación veciñal, tanto das propostas inscritas no concurso como daquelas que, sen participar formalmente, contribuíron á ambientación do Entroido.
A asociación aclarou que os premios non son acumulativos. Aínda que “A Granxa vai de Entroido” obtivo a maior puntuación nas tres categorías —máis elaborado, máis entroideiro e meco de grupos— foi proclamado gañador no apartado de máis elaborado por ser onde acadou a puntuación máis alta. As seguintes propostas con maior puntuación nas outras categorías foron “A Meca Liberdade” en máis entroideiro e o Meco do IES San Mamede en meco de grupos.