A Deputación saca a concurso un programa de apoio a emprendedores
Redacción OurensexaA Deputación de Ourense, a través do Inorde, vén de iniciar o procedemento de licitación do Programa de apoio ao emprendemento e consolidación empresarial vinculado ao destino rural Ourense Termal. O prazo para presentar ofertas remata o vindeiro 6 de maio ás 14.00 horas.
Este programa está aprobado no marco do Plan de Sostibilidade Turística en Ourense Termal, a través do que se financia esta acción, recollida no convenio suscrito pola Deputación, a Xunta de Galicia e a Secretaría de Estado de Turismo. Así, trátase dun programa de formación, apoio, consultaría e asesoramento para o impulso a proxectos relacionados, directa ou indirectamente, co entorno termal e cuxo orzamento ascende a 76.000 euros.
Os obxectivos desta acción baséanse en articular un programa, tanto para emprendemento como para empresas existentes; servir de impulso para xerar un impacto económico positivo, xa sexa en termos de destinatarios, de promotores ou de impacto no medio; que teña como finalidade xerar desenvolvemento sostible; e que xere emprego de calidade nos municipios do destino rural Ourense Termal.
Xente moza e igualdade
Estes obxectivos articularanse a través do apoio a proxectos que impulsen o sector termal e o dinamismo económico do entorno; do desenvolvemento de negocios no entorno rural; do fomento á promoción do emprendemento, sobre todo entre xente moza e con maior atención aos que presenten maior risco de precariedade laboral e á muller, coa fin de acadar a igualdade efectiva de oportunidades.
O programa contempla unha primeira fase de captación e proceso de selección de proxectos, co obxectivo de identificar ata 30 potenciais proxectos que se dividan en dúas áreas: a de emprendemento (formación e asesoría para converter unha idea nun negocio), que contemplará formación colectiva, titorías e mentorías individualizadas e masterclass; e a de desenvolvemento (destinado a empresas xa existentes que busquen crear novas liñas de negocio que aporten valor ao destino rural Ourense Termal), que será personalizada, cun total de 20 horas de mentorización por proxecto.