A Dirección de Atención Primaria da Área Sanitaria de Ourense asegura que a atención sanitaria en Maceda recuperará a normalidade o mércores
A Dirección de Atención Primaria da Área Sanitaria de Ourense, Verín e O Barco de Valdeorras, asegura que reorganizou a atención sanitaria no Centro de Saúde de Maceda para este luns 29 e martes 30 de decembro, tras as denuncias realizadas desde o PSdeG pola falta de médicos durante ambos días.
Desde o Sergas explican que a atención médica ordinaria se prestará en horario de tarde, mentres que nas mañás estará garantida a continuidade asistencial coa presenza de dúas enfermeiras para atender a demanda habitual e os coidados continuos. En caso de urxencias médicas durante a mañá deste martes, activarase o protocolo de derivación ao servizo de urxencias 061.
Desde a Dirección Médica sinalan que a falta de médicos dispoñibles para cubrir as ausencias é un problema xeneralizado que afecta non só a Ourense, senón a nivel estatal, e garantizan que o mércores se retomará a atención de forma normal neste centro.