A función 'ELLA', de Albert Boadella, chegará ao Teatro Principal
A función "ELLA", escrita e dirixida polo prestixioso dramaturgo Albert Boadella, chega ao escenario do Teatro Principal de Ourense cunha dobre función os días 13 e 14 de decembro.
A peza está protagonizada pola actriz e cantante María Rey-Joly, o pianista Rubén Sánchez e o violinista Alfredo Ancillo.
Sinopse
Ela sofre unha violación. Do mesmo xeito que nos accidentes violentos ou crueis, a mente tende ante isto a evocar unha gran cantidade de imaxes e sensacións que se afastan do trance brutal.
Nun ínfimo espazo de tempo poden condensarse actos, recordos e situacións que requerirían horas ou días para reconstruílos na memoria. Neste caso, para ela, pasado e futuro mestúranse nun intento de evadirse da humillación e do tormento.
As asociacións mentais do inconsciente faranse reais ante o espectador a través do canto e dalgúns impulsos mecánicos da súa vida cotiá, moi ligados á condición feminina. O que mentalmente supón o impacto traumático desenvólvese na obra baixo un tempo real.