A oitava edición do Festival RiR reuniu máis de 30 curtametraxes e entregou un premio a O Carrabouxo
Allariz acolleu entre o 30 de agosto e o 6 de setembro a oitava edición do Festival Internacional de Curtas de Comedia (RiR), consolidándose como unha cita de referencia no eido do humor audiovisual e socialmente comprometido. Durante estes días, o evento combinou proxeccións de cine, espectáculos teatrais, música en directo e actividades paralelas que permitiron ao público interactuar con artistas e creadores.
Nesta edición competiron un total de 36 curtametraxes distribuídas en diferentes bloques temáticos, con títulos nacionais e internacionais como Peras al horno, La Boda, Sweet Cabanyal, Conquerors ou La pandilla del Capitán Mondongo.
O momento máis destacado da clausura, celebrada o sábado 6 de setembro, foi a entrega do Premio RiR Contigo 2025 ao viñetista ourensán Xosé Lois González, coñecido como Carrabouxo, en recoñecemento á súa traxectoria no humor gráfico en galego.
A imaxe desta edición estivo a cargo da deseñadora Soraya Picouto, quen plasmou no cartel unha cámara de cine que rega flores grises que acaban florecendo en cores, simbolizando “o poder do humor e da cultura para devolvernos a alegría cando todo parece gris”.
Desde o Concello de Allariz destacaron a calidade das curtametraxes participantes e agradeceron á organización por elixir a localidade como sede do festival, que cada ano medra e ofrece máis risas aos asistentes.