A Subdelegación do Goberno pon en valor o labor de “A Casa Vella” na súa aposta polo territorio e as tradicións
O subdelegado do Goberno en Ourense, Eladio Santos, visitou o espazo de creación cultural “A Casa Vella”, sito no municipio de Amiadoso, no Concello de Allariz, para coñecer a historia deste proxecto da man dos seus impulsores, Nuria Sotelo e Rubén Vilanova.
“A Casa Vella” é un espazo que procura a creación artística e a dinamización social e cultural do territorio. Pola súa situación privilexiada no rural ourensán serve de lugar de traballo idóneo para artistas e profesionais culturais, mellorando o seu rendemento, inspiración e capacidade de innovación. Ao tempo que dinamiza o territorio e pon en valor o patrimonio e recursos propios, establecendo relación coa comunidade local, na que se inspiran e para a que ofrecen actividades, mostras e outras iniciativas, levadas a cabo en colexios, institutos e no núcleo de Amiadoso e outros limítrofes.
O subdelegado do Goberno mostrou o seu recoñecemento a esta iniciativa e salientou o traballo dos seus responsables “sacando adiante con esforzo un espazo cultural de calidade único en Galicia, integral e vencellado ao territorio”. Por unha banda, trátase dunha residencia de artistas, creada nunha antiga casa de labranza, que se atopa en proceso de rehabilitación, con “respecto absoluto ao patrimonio tradicional galego”, destacou.
Por outra, entre os creadores que alberga, moitos deles de lírica e danza, atópanse nomes consagrados como os de María Muñoz, Mónica Valenciano e Luz Arcas (premios nacionais de danza nos anos 2009, 2012 e 2023, respectivamente), xunto a Ana Vallés, medalla de ouro das Artes Escénicas no 2024. Todos os artistas, emerxentes e consagrados, participan en actividades para os veciños, comparten a súa experiencia con outros creadores e enriquécense do mundo rural galego.
“É unha experiencia cultural innovadora, que impregna o rural dunha cultura de primeirísimo nivel, e viceversa, xa que ao mesmo tempo os artistas aproveitan a observación e coñecemento do rural ourensán“, asegurou Santos.
De feito, “A Casa Vella” ten en marcha a recuperación de tradicións galegas, como a matanza ou o uso de leña como enerxía calorífica, nunha aposta pola sustentabilidade. “É unha iniciativa global que está moi valorada polos veciños, xa que non busca o espectáculo, senón a transformación cultural, achegando a cultura a pequenos e maiores do pobo, e reivindicando a nosa tradición”, destacou.
Axudas do Ministerio de Cultura
Este espazo cultural foi unha das iniciativas beneficiarias, na convocatoria do 2024, das axudas concedidas polo Ministerio de Cultura, a través do Instituto Nacional de las Artes Escénicas e da Música (INAEM), coas que o Goberno procura a preservación do patrimonio cultural coreográfico, lírico e musical, favorecendo a igualdade de toda a cidadanía no acceso aos servicios culturais.
Precisamente ata o vindeiro 26 de marzo mantense aberto o prazo de solicitude para a convocatoria de 2025, que conta cun orzamento de 8.058.172 euros. Entre as actividades subvencionables atópanse xiras nacionais e internacionais; festivais, mostras, certames e congresos; espazos escénicos e musicais con programación estables de danza; residencias artísticas para danza, lírica e música, entre moitas outras, pero todas elas deben ter lugar entre o 1 de xaneiro e o 31 de decembro deste ano. As solicitudes deben presentarse exclusivamente de xeito electrónico a través do Ministerio de Cultura.
Como novidade, nesta convocatoria concederase, polo menos, o 40% da axuda solicitada, fronte ao 5% mínimo establecido en anteriores edicións.