Abre o prazo de solicitudes para o programa ChegOU 2025 de fomento da natalidade
A Deputación de Ourense vén de abrir o prazo para solicitar as axudas contempladas no Programa ChegOU, de fomento da natalidade, que no presente ano inclúe novos criterios que teñen en conta o grao de discapacidade dos proxenitores ou a condición de familia numerosa, de tal modo que as achegas poden pasar de 300 a 1.250 euros.
As persoas beneficiarias destas axudas recibirán a tarxeta prepago ChegOU, que estará activa ata o 31 de maio de 2026, e facilitará a compra en farmacias ou parafarmacias da provincia de Ourense de produtos hixiénicos, de alimentación ou saúde relacionados co primeiro ano de vida dos bebés. Este ano, ademais, amplíase o uso da tarxeta a centros ópticos, de audición ou ortopedias co fin de adquirir produtos específicos que fagan máis doada a crianza e coidado dos recen nados.
Para este programa, a Deputación de Ourense destina un orzamento de 400.000 euros en concepto de axudas, que están destinadas a proxenitores de menores nados entre o 1 de xaneiro de 2025 e o 31 de decembro deste ano, así como a persoas adoptantes ou que adquiran a condición de titores neste mesmo período. O último día do 2025 remata o prazo de presentación de solicitudes.
As contías das achegas varían en función do grao de reto demográfico do concello de empadronamento (entre 300 e 500 euros); segundo a discapacidade da persoa solicitante (750 ou 1.000 euros); ou segundo a condición de familia numerosa, caso no que terán dereito a un incremento de 250 euros na axuda.
Na procura da maior flexibilidade para presentar as solicitudes, a área de Benestar ofrece a posibilidade de utilizar o sistema de administración por voz. Así, aínda que o solicitante non teña ordenador, ou coñecementos tecnolóxicos ou certificado dixital, esta persoa poderá realizar a súa petición ante a administración provincial desde o seu teléfono móbil, asinando a solicitude a través da súa voz, o que se coñece como sinatura biométrica vocal.
Solicitar o ChegOU desde a habitación do Hospital
A principal causa de exclusión dixital ante as administracións públicas é a imposibilidade que teñen moitas persoas de identificarse dixitalmente. Este ano, desde o primeiro día de apertura do prazo, as nais que deran a luz e queiran solicitar a axuda do Programa ChegOU desde o propio hospital poderán asinar a súa solicitude desde a súa habitación do centro sanitario só coa súa voz.
Nos horarios previamente coordinados polo persoal técnico do hospital e a área de Benestar, a solicitante deberá facer click nunha ligazón que terá á súa disposición nun dispositivo electrónico facilitado pola Deputación, e así ser atendido a través do mesmo por un empregado público que cubrirá a solicitude on-line en tempo real. Unha vez terminada poderá vela no dispositivo electrónico e asinaraa coa voz.
No prazo máximo de sete días hábiles desde o momento de realizar a solicitude desde a habitación do hospital (no caso de que cumpran os requisitos solicitados para a concesión da axuda) a persoa recibirá no seu domicilio a tarxeta ChegOU.
Primeira beneficiaria de 2025
Entre as primeiras solicitantes do programa ChegOu 2025 figura Stefannya, que logo de dar a luz a Luca puido pedir escasas horas despois a axuda provincial á natalidade desde a súa propia habitación do CHUO, utilizando o dispositivo electrónico e asinando a solicitude coa súa voz. En tempo real recibiu no seu teléfono móbil a solicitude xa presentada no rexistro electrónico provincial
Tramitación de solicitudes e sinatura por voz
Tamén se ofrece a opción de tramitación de solicitudes sen necesidade de certificado dixital, poñendo a disposición dos proxenitores un número de teléfono (988 317 766) para fixar unha cita e asinar a súa petición desde a súa casa, só cun móbil e a través da súa voz. Recibirán un correo electrónico, ou tamén a través de WhatsApp, cunha ligazón para ser atendido o día e a hora que mellor se lle adapte.
No día da cita poderán deberán premer no ligazón e serán atendidos a través do teléfono móbil ou do ordenador por un empregado público que cubrirá a solicitude on-line. Unha vez rematada poderá vela no seu dispositivo e asinala por voz. A voz da persoa é a firma biométrica vogal e queda anexa á solicitude, da que recibirá no mesmo día unha copia xa rexistrada.