Educación

A Feira ten como obxectivos fundamentais fomentar o intercambio de experiencias, a aprendizaxe colaborativa e o fortalecemento das relacións entre os diferentes niveis educativos

I Feira Educativa de Ourense

Expourense acolleu este mércores e xoves, 2 e 3 de abril, a primeira Feira Educativa de Ourense, unha cita impulsada pola Xunta, a Deputación de Ourense e a Fundación Expourense, co obxectivo de fomentar o intercambio de experiencias, a aprendizaxe colaborativa e o fortalecemento das relacións entre os diferentes niveis educativos. Nesta primeira edición da feira participan unha ducia de centros educativos, ademais do Centro Galego da Innovación da Formación Profesional Eduardo Barreiros, o Centro de Formación e Recursos do Profesorado de Ourense e o Centro Residencial Docente.

No que atinxe aos colexios institutos, preséntanse iniciativas que traballan coa ópera como vehículo de aprendizaxe, coa radio escolar, a robótica ou ferramentas 3D, ademais de afondar en programas de mediación escolar, interdisciplinares, o STEMbach ou os Clubs de lectura. Contan co seu propio espazo os colexios CEIP O Couto e Plurilingüe Amadeo Rodríguez Barroso (ambos en Ourense), Roberto Blanco Torres (A Peroxa) e Xoaquín Lourenzo Xocas (Bande) e os institutos IES Blanco Amor (Ourense), Ferro Couselo (Ourense), O Ribeiro (Ribadavia) e Xesús Taboada Chivite (Verín).

A FP tamén está presente na feira, con espazos nos que se celebran degustacións e demostracións de actividades de microscopía, actividades deportivas, emerxencias sanitarias, realidade virtual ou imaxe e son. Corren a cargo dos centros integrados CIFP A Carballeira-Marcos Valcárcel, A Farixa e Portovello, os tres de Ourense, e o CIFP Vilamarín.

A cita ourensá enmárcase no novo calendario de feiras Galicia Educa, impulsado pola Xunta para dar visibilidade a estes eventos como ferramenta para mellorar a orientación formativa e vocacional do alumnado, e ao mesmo tempo, amosar o bo traballo que desenvolven os centros escolares.

Galicia Educa inclúe feiras a nivel autonómico, provincial, comarcal e local. Seis delas, entre elas esta feira de Ourense, son de nova creación este ano.

Talento ourensán

O presidente da Deputación, acompañado pola directora xeral de Ordenación e Innovación Educativa, Judith Fernández Novoa; o delegado territorial da Xunta, Manuel Pardo; o director territorial de Educación, Ciencia, Universidades e Formación Profesional, Jorge Rubén Sampedro Grande; así como polo xerente de Expourense, Rogelio Martínez, participou na inauguración.

Luis Menor explicou que esta feira, a primeira dunha serie que terá como escenario outros puntos de Galicia, “foi desde o seu xérmolo un obxectivo prioritario para a Deputación de Ourense”, demostrando esa vocación de colaboración institucional traballando conxuntamente co Goberno galego a través da Consellería de Educación, Ciencia, Universidades e Formación Profesional. “Unha colaboración que fai da Deputación ourensá a administración provincial galega que máis liñas de cooperación mantén abertas coa Xunta de Galicia”, lembrou Menor.

Así, e dentro desta nova unha nova liña de traballo conxunto, a educativa, Menor expresou o seu convencemento de que as administracións teñen “a obriga de xerar talento entre as novas xeracións”, así como de “reter esas capacidades no noso territorio”.

Por último, recalcou o presidente provincial que esta acción ten como obxectivo primordial axudar á mocidade e ás familias nun momento tan crucial como é o de “elixir qué queren ser”, así como amosar “o moito e ben que traballa o sistema educativo”. E confirmou que “todo o que é importante e de interese para a provincia, ten o apoio da Deputación”.

Interacción entre universidades e centros educativos

Esta primeira Feira Educativa ten como obxectivos fundamentais fomentar o intercambio de experiencias; a aprendizaxe colaborativa; e o fortalecemento das relacións entre os diferentes niveis educativos, promovendo a interacción entre universidades e centros educativos para fortalecer o desenvolvemento de boas prácticas pedagóxicas e a formación integral do alumnado.

Tamén buscará propiciar un encontro, onde universidades, centros de formación e outras institucións educativas, expoñan as súas ofertas académicas aos alumnos, familias e colexios, tratando de dar resposta ás necesidades de información sobre a oferta formativa e orientación.

Por último, tamén fixa como meta fomentar a colaboración entre docentes, estudantes e comunidades educativas para compartir experiencias, fortalecer o traballo en rede, crear un espazo de intercambio e impulsar a educación inclusiva e adaptada aos retos sociais e educativos do século XXI.