O delegado da Xunta en Ourense anima á veciñanza da provincia a solicitar as axudas á accesibilidade
O delegado territorial da Xunta en Ourense, Manuel Pardo, desprazouse esta mañá a rúa Cabeza de Manzaneda da cidade de Ourense para supervisar a instalación dun ascensor nunha comunidade de propietarios, beneficiaria da orde de axudas de accesibilidade da Xunta, cunha achega de máis de 79.000 euros, que lles permitiu instalar un ascensor.
O delegado territorial salientou a importancia destas axudas da Consellería de Vivenda e Planificación de Infraestruturas, cuxo obxectivo é apoiar á cidadanía no financiamento de obras e instalacións que contribúan a eliminar barreiras arquitectónicas, faciliten o acceso ou favorezan a autonomía e a mobilidade tanto en construcións unifamiliares como en edificios de tipo residencial colectivo e nas vivendas que os integran. Ademais, as actuacións poderán realizarse non só dentro dos inmobles senón tamén nos espazos comúns, como xardíns ou zonas deportivas, e naqueles que serven para comunicalos co exterior.
Na visita a este inmoble, Manuel Pardo, aproveitou para informar que está aberta ata o 28 de abril unha nova convocatoria destas axudas, dotada cun orzamento de 5,3 millóns de euros, e que as solicitudes realizaranse preferiblemente por vía electrónica, mediante a Web do Instituto Galego da Vivenda e Solo.
O delegado territorial explicou que os importes das achegas serán de ata 12.500 euros en vivendas unifamiliares; ata 9.000 euros por cada piso susceptible de recibir a subvención, en edificios de tipoloxía residencial colectiva; e ata 6.000 euros por piso “illado” en un residencial colectivo. As vivendas terán que estar finalizadas antes do 2006, non se esixirá este requisito no suposto de que na vivenda habiten persoas cun grao de discapacidade recoñecido igual ou superior ao 33%.
Subliñou o representante do Goberno galego que as axudas poden chegar ata o 80% do
gasto no caso de persoas con discapacidade ou maiores de 65 anos, por iso son moi demandadas.
Actuacións subvencionables
O delegado territorial aclarou que con estes incentivos, os beneficiarios poderán acometer, tanto na vivenda como en zonas comúns, instalacións de ascensores, salvaescaleiras, ramplas, automatismos para a apertura de portas, videporteiros, iluminación no portal ou colocación de guindastres.
Tamén se contemplan entre as actuacións subvencionables medidas de accesibilidade que faciliten a autonomía e a vida independente de persoas con mobilidade reducida incluíndo dispositivos adaptados ás necesidades das persoas con discapacidade sensorial ou intelectual. Inclúense mecanismos de identificación como teléfonos intelixentes, cámaras ou pantallas e outros dispositivos tecnolóxicos como sistemas de apertura e control de accesos e doutros sistemas que necesiten control persoal.
A orde cubre igualmente a instalación de elementos de información, de comunicación e de aviso como sinales luminosas, visuais ou sonoras que melloren a accesibilidade e seguridade e a instalación de domótica para favorecer a autonomía das persoas maiores o con discapacidade. Tamén son subvencionables os gastos de honorarios, licenzas e xestión das actuacións.