O Museo de Olería de Niñodaguia organiza a V Fornada Tradicional de Niñodaguia
Con motivo dos Días Europeos da Artesanía, o conselleiro de Emprego, Comercio e Emigración, José González, acompañado do delegado da Xunta en Ourense, Manuel Pardo, do director xeral de Comercio e Consumo, Gabriel Alén, e da xerente de Artesanía de Galicia, Elena Fabeiro, visitou este martes dous obradoiros que desenvolven un papel fundamental na preservación da olería tradicional en Galicia: Alfarería Alto do Couso, situada no concello de Esgos, e Alfarería Agustín de Niñodaguia, en Xunqueira de Espadañedo.
Durante a xornada, na que tamén participaron os alcaldes de ambos municipios, Mario Rodríguez e Carlos Gómez, José González puxo en valor que estes talleres, ambos adheridos a Artesanía de Galicia, representan un exemplo paradigmático de emprendemento estreitamente vencellado ao seu territorio e referentes de salvagarda e protección dun oficio no que a remuda xeracional é clave para blindar o futuro. Así, destacou que tanto Hermesindo Álvarez, en Alto do Couso, como José Vázquez, en Alfarería Agustín, son a segunda xeración dos seus respectivos negocios, recollendo a testemuña e o saber facer dos seus proxenitores e adaptando a olería ao novos tempos sen perder a súa esencia orixinal. Cómpre sinalar, ademais, que o artesán Agustín Vázquez —pai do actual propietario deste obradoiro, recibiu o Premio Artesanía de Galicia en 2019 á súa traxectoria e foi un dos impulsores do Museo de Olería de Niñodaguia, un dos catro centros de olería tradicional activos en Galicia, xunto con Buño, Gundivós e Bonxe.
Plan estratéxico do comercio de Galicia
O conselleiro de Emprego salientou que a artesanía é un sector absolutamente prioritario, xa non só desde o punto de vista patrimonial e cultural, senón tamén como fonte de emprego e de emprendemento, clave para fixar poboación e dinamizar o territorio.
A este respecto, José González destacou que precisamente onte o Consello da Xunta aprobou o Plan estratéxico do comercio de Galicia 2025-2030, unha folla de ruta dotada con máis de 320 M€ no que a artesanía ten un oco prioritario. Así, entre as máis de 70 accións previstas na planificación, contémplanse medidas específicas centradas na remuda do tecido artesán, entre as que destacan o impulso de bolsas de aprendices complementarias á iniciativa Aprender da tradición, un programa pioneiro impulsado pola Xunta desde 2023 co obxectivo de recuperar e transmitir técnicas tradicionais e de atraer novos talentos. Tamén se prevé seguir estimulando diferentes vías de comercialización e artellar novas actividades de divulgación como Artesanía na escola, para achegar os oficios ás novas xeracións, buscando espertar novas vocacións que garantan a remuda e reforcen as cifras positivas que xa se veñen rexistrando nos últimos anos: dende 2014, arredor do 50 % dos novos obradoiros que se rexistran responde a un perfil de novos talentos que se introduce no mundo da artesanía.
Días Europeos da Artesanía
As visitas realizadas coinciden coa celebración dos Días Europeos da Artesanía 2025, unha conmemoración que se desenvolve cada ano en diferentes países co obxectivo de divulgar os oficios artesanais e amosar a súa enorme riqueza e singularidade e que na nosa Comunidade coordina a Fundación Artesanía de Galicia.
Neste marco, a Fundación Artesanía de Galicia colabora ao longo desta semana con máis de 70 actividades nas catro provincias, como demostracións en vivo, visitas guiadas, talleres, exposicións ou xornadas de portas abertas. Entre as que se apoian na provincia de Ourense, precisamente este sábado 5 de abril, o Museo de Olería de Niñodaguia organiza a V Fornada Tradicional de Niñodaguia nos antigos fornos de pedra, unha cita imprescindible para poñer en valor a tradición oleira.