Ourense implanta un novo PAI para persoas con diabetes tipo 2

No acto, no que participaron o Xefe de Servizo de A Cuña, Xosé Luis Muiño López-Álvarez, a Endocrinóloga do CHUO, Iria Pinal Osorio, e o Enfermeiro Especialista en Familiar e Comunitaria do Centro de Saúde de A Valenzá, José Manuel Álvarez Pena, incidiron en que o proceso  presentando recolle todas as fases de atención á diabetes mellitus tipo 2, de feito, esta atención non só debe ir dirixida ao tratamento, senón, tamén, á detección precoz o que permitirá atallar as posibles complicacións que poden aparecer coa evolución da enfermidade.

Este documento, presentado na Consellería a finais de novembro do pasado ano 2023, é froito do traballo dun grupo de profesionais do sistema sanitario galego, entre os que se atopa o Xefe de Servizo do Centro de Saúde de A Cuña, Xosé Luis Muiño López-Álvarez, coordinados dende a Subdirección Xeral de Atención Primaria do Sergas.

A abordaxe das enfermidades crónicas a través de procesos asistenciais integrados, contribúe á mellora da efectividade das actuacións sanitarias e á diminución da variabilidade clínica. A Estratexia galega de atención ás persoas en situación de cronicidade busca crear modelos asistenciais baseados nunha valoración integral do doente, avaliando a repercusión da enfermidade, e traballando de xeito coordinado entre profesionais dos distintos ámbitos para garantir a continuidade asistencial.

Este proceso asistencial integrado, que actualizaba o de 2015, súmase aos cinco que a Consellería presentou tamén o pasado ano, que son o de déficit Alfa 1 Antitripsina; o de Epoc; o da enfermidade inflamatoria intestinal; o da enfermidade renal crónica e o do dano cerebral adquirido.

Para Xosé Luis Muiño, “trátase dun proceso que se centra na persoa e non na enfermidade, posto que, a pesar de que existe un seguimento constante por parte dos profesionais da nosa área sanitaria, buscamos tamén a corresponsabilización das persoas coa enfermidade, asumindo o seu autocoidado e a realización de exercicio físico como obxectivos propios”. Cómpre subliñar que “a diabetes é unha enfermidade enormemente importante xa que aumenta o risco cardiovascular, a retinopatía diabética, que é a principal causa de cegueira, de amputacións non traumáticas, ou de nefropatía diabética, e que grazas aos tratamentos actuais estanse a lograr a diminución destas complicacións”. En Galicia a Diabetes Mellitus tipo 2 afecta a un 9,11 % da poboación en persoas maiores de quince anos.

A endocrinóloga do CHUO, Iria Pinal, destaca que “este PAI da diabetes supón un gran beneficio para o paciente xa que permite que os profesionais que o tratan falemos o mesmo idioma, estea o paciente en primaria ou hospitalaria, que unifiquemos criterios e que grazas a esa visión global o paciente síntase sempre seguro e perfectamente atendido”.

Este proceso integral ten un marcado carácter multidisciplinar e a visión integradora do sistema sanitario galego, ao definir as actividades sanitarias a realizar, así como os perfís profesionais de referencia, ademais de reforzar a importancia da promoción da saúde desde a atención primaria.

O enfermeiro especialista en familiar e comunitaria do Centro de Saúde de A Valenzá, José Manuel Álvarez Pena, destacou que “é fundamental que tanto o paciente e a súa familia se impliquen no tratamento axeitado desta enfermidade porque vai implicar a modificación de hábitos propios e da súa contorna e na maioría dos casos adoptar estilos de vida máis saudables baseados, en gran medida, nunha alimentación máis sá e no exercicio físico de forma regular”

Polo tanto o PAI que hoxe presentouse en Ourense supón un modelo de verdadeira atención integral, de coordinación e de continuidade asistencial.