Ourense recupera no mes de maio as súas Xornadas de Enfermaría
Tras un intenso traballo de organización, a Dirección de Enfermería da Área Sanitaria de Ourense, Verín e Valdeorras recupera este ano as súas “Xornadas de Enfermería”, marco de difusión da actividade científica e investigadora deste colectivo, que nesta edición se refunda cunha clara vocación de integración, dando visibilidade aos seus diversos ámbitos de traballo, tanto a nivel de centros como especialidades e profesións, cunha programación que contempla por vez primeira obradoiros pre-xornada, nos hospitais públicos de Verín e Valdeorras, no de Ourense e na Aula de Simulación.
Esta iniciativa pioneira en Galicia, xurdiu da constitución, xa en 1998, do Premio de Enfermería do Hospital Universitario de Ourense, ao que pouco despois se sumou a Atención Primaria e seguidamente os Hospitais Públicos de Verín e Valdeorras, ademais da Escola Universitaria de Enfermería. O premio derivou, en 2005, nas primeiras xornadas, decanas a nivel galego, co obxectivo de difundir os numerosos traballos presentados, ademais de abordar os temas de actualidade na profesión.
Continuando coa tradición, este ano celebraranse os días 14 e 15 de maio, na semana do Día Internacional da Enfermería, que conmemora o nacemento o 12 de maio de Florence Nightingale, considerada a fundadora da enfermería moderna, que evolucionou cara a actual profesión troncal da asistencia sanitaria, historicamente fortalecida da experiencia e superación de situacións de crise, como o recente período marcado pola pandemia e pola recuperación de ámbitos como a humanización e a comunidade en todos os niveis asistenciais.
Co prazo de inscrición e envío de comunicacións aínda abertos, aínda é pronto para coñecer o nivel de participación nas XIV Xornadas de Enfermería, pero as previsións da organización, a Dirección de Enfermería da Área Sanitaria de Ourense, Verín e Valdeorras espera unha alta asistencia no Campus Universitario de Ourense, que voltará a ser a sede das xornadas.
Premio ao esforzo investigador
Esta reunión científica, pioneira e referente no sector a nivel galego, serve para difundir os traballos de investigación publicados ou presentados ao longo dos pasados doce meses nos diversos congresos, simposios ou reunións científicas autonómicas, nacionais e internacionais, requisito imprescindible para concorrer ao Premio de Enfermería de Ourense.
Xunto aos obxectivos xerais o lema desta edición é “Integrando Ciencia e Humanidade” que subliña a necesidade de avanzar na especialización e coidados baseados na evidencia, sempre sen perder o papel da enfermería como referente no contacto directo cos pacientes e as súas familias, en todos os ámbitos profesionais ou centros asistenciais.
Tanto o premio como as xornadas teñen por obxectivo o estímulo da importante labor clínica e investigadora da enfermería da provincia, recoñecendo un esforzo científico que, mediante a súa aplicación a práctica diaria, contribúe a mellorar a calidade dos coidados prestados ao paciente, e potencian o desenvolvemento profesional, así como o fomento da súa difusión en reunións e publicacións científicas.
Pacientes e traballadores son beneficiarios directos desta iniciativa, xa que un dos seus obxectivos é precisamente trasladar á práctica diaria os procedementos e actividades que, mediante o estudio, se demostraron como máis eficaces para o coidado e mantemento da saúde.
Obradoiros pre-xornada
Xunto co día central das xornadas, no Salón de Actos Marie Curie do Edificio Politécnico, o xoves día 15 de maio. Nesta edición ofertarase unha intensa xornada pre-xornada o día anterior, cun carácter eminentemente práctico. Os obradoiros realizaranse por vez primeira nos hospitais públicos de Verín e Valdeorras, ademais de no Universitario de Ourense e na Aula de Simulación.
A Aula de Docencia do Hospital Público de Valdeorras será sede do taller RCP básica en pediatría, impartido Beatriz Rodríguez Collazo. Tamén no Hospital Público de Verín abordaranse, en xornada de tarde, os de “Manexo de incidencias e urxencias no paciente pediátrico”, por Mónica González Dacosta; e “Pé diabético: Do screening ate a amputación…rompendo o círculo” por parte de Navor Pereira Losada.
O Universitario de Ourense repartirá os talleres nas súas diferentes aulas. Na Rosa Prol: “Solo pelviano” a cargo de Patricia Chamorro Nuñez e Isabel de la Torre; “Como iniciar un estudo de investigación” de Ana Belén Rodríguez Feijoo e Miriam Vázquez Campo. O Salón Cabaleiro Goás acollerá os obradoiros de Vendaxe funcional, de Rubén Iglesias García e Manexo de sensores de monitorización continua da glicemia por parte de Ana Fernández Conde. Por ultimo a Aula Innovación será a sede dos talleres “Coidados de accesos venosos” por parte de Antonio Paz Millán e Eva Outomuro Díaz; para seguidamente abordar o de “Vendaxe neuromuscular” de Javier Martínez Pérez.
Tamén como novidade este ano as xornadas de enfermería esténdense ás Aulas de Simulación da Área Sanitaria de Ourense, situadas na Avda. Zamora. Nelas impartirase o taller “Manexo do parto e urxencias extrahospitalarias” a cargo de Patricia Feijoo Garrote, Álvaro Carrera García e Pablo Taboada Pampín.