Presentan en Ourense a 38ª edición do Anuario da Gaita, referente internacional na música tradicional
A Deputación de Ourense presentou hoxe a 38ª edición do Anuario da Gaita, unha publicación que dende 1986 recolle o labor da Escola Provincial de Gaitas. Este volume, referente internacional en investigación sobre este instrumento, recolle a actividade do ano anterior e achegas científicas sobre a gaita e a música tradicional.
Na presentación, o asesor de Cultura da Deputación, Marcos Vázquez, destacou que o anuario “evolucionou dende unha humilde publicación a un referente global en rigor científico e recursos sobre a gaita.” Investigadores como Óscar Ibáñez e Juan Carlos López subliñaron que esta obra é fundamental tanto en Galicia como no ámbito internacional, promovendo o interese polas xeracións máis novas.
Xosé Lois Foxo, director da Escola Provincial de Gaitas e coordinador do anuario, afirmou que esta publicación dá visibilidade ao traballo de destacados especialistas europeos, “proyectando unha imaxe única dende Ourense cara ao mundo.”
Nesta edición, os lectores atoparán estudos sobre a gaita sueca, a “säckpipa,” investigada por Anna Rynefors, e a gaita belga, por Pol Ranson, ademais dun artigo sobre os sons da rúa en Arxentina e Uruguai, como o apito galego, por Norberto Pablo Cirio. Tamén se inclúen fotografías antigas, actividades como o Serán da Seitura e o concerto de Nadal da Real Banda de Gaitas, e lembranzas a figuras destacadas da música tradicional como o profesor Domingo Neira e o percusionista Allan Chatto.
O anuario, distribuído en bibliotecas de todo o mundo, reafirma a súa importancia como embaixador cultural da gaita galega e das tradicións que representa.