Sanidade asegura que o traslado dos pacientes do Materno Infantil de Ourense estará completado no verán
O conselleiro de Sanidade, Antonio Gómez Caamaño, avanzou hoxe que no verán estará culminado o traslado provisional da hospitalización do Materno Infantil de Ourense e remarcou que o máximo interese da Xunta con esta medida é garantir a asistencia e a tranquilidade dos usuarios, pacientes e de todas as persoas que traballan no hospital.
O titular da carteira sanitaria do Executivo galego mantivo hoxe unha reunión de traballo en relación ao traslado, na que participou o delegado territorial da Xunta en Ourense, Manuel Pardo; o director xeral de Asistencia Sanitaria do Sevizo Galego de Saúde, Alfredo Silva; a directora xeral de Recursos Económicos do Sergas, Amparo Pousada, e o xerente da área sanitaria, Santiago Camba.
Segundo o conselleiro, tendo en conta que sería convinte reforzar os falsos teitos e que para acometer esa actuación sería necesario parar a actividade do Materno varias semanas, o que se decidiu é anticipar ese traslado provisional que xa estaba previsto para reubicar a zona de hospitalización infantil e obstétrica, así como os paritorios noutros espazos existentes do complexo hospitalario.
O máximo responsable da Sanidade galega remarcou que o edificio do Materno non ten problemas estruturais e as deficiencias detectadas nos falsos teitos que farían necesario un reforzo.
Explicou que xa hai meses a Xunta tomou a determinación de construír un novo edificio para o Materno Infantil que obriga ao traslado dos servizos que agora alberga ao edificio de hospitalización que está en execución.
Ante esta situación, o conselleiro incidiu en que a Xunta decidiu que o máis sensato era anticiparse a ese traslado e planificar xa agora a reorganización da zona de hospitalización infantil, obstétrica e os paritorios para dispoñelas noutros espazos xa existentes do complexo hospitalario.
Traslados progresivos
O conselleiro dixo que o traslado obrigará a movementos previos para a adecuación dos espazos que se levarán a cabo de xeito inmediato para actuar coa máxima axilidade. En concreto sinalou que, xa o vindeiro luns, iniciaranse os labores polo persoal de mantemento, co fin de conseguir que, a comezos do verán, estean realizadas as actuacións de adecuación de espazos e culminados os traslados, que se farán de xeito progresivo, a medida que se vaian acondicionando as zonas.
Gómez Caamaño puxo en valor o intenso traballo realizado pola Xerencia para presentar, en moi breve prazo, unha planificación de reubicación que permite garantir a mellor asistencia aos pacientes e, ademais, en constante diálogo cos profesionais, aos que lles agradeceu a súa comprensión.
Renovación do Complexo Hospitalario
O titular da carteira sanitaria subliñou que a Xunta está a traballar intensamente na renovación do Complexo Hospitalario Universitario de Ourense, ao que destina 52 millóns de euros coa construción dun novo edificio de hospitalización e un novo Hospital Materno Infantil.
Unha vez que finalicen as obras do edificio de hospitalización que se están a executar, os servizos do Materno Infantil reubicaranse alí. Estas obras teñen un prazo de execución de 12 meses e, en poucos días comezarán a coller ritmo, logo dos axustes que foi preciso realizar no proxecto. O obxectivo, dixo o conselleiro, é que estea en funcionamento ao redor de mediados do vindeiro ano e encadear logo a construción do novo Materno.