50 anos de traxectoria do escultor ourensán Xosé Cid
O Centro Cultural Marcos Valcárcel é o escenario escollido polo escultor Xosé Cid para facer un repaso ao seu traballo artístico ao longo dos últimos 50 anos, a través da exposición “Silencio e materia”, comisariada por Rosendo Cid.
Nesta mostra, que ocupa as dúas grandes salas expositivas do centro cultural e na que se poden ver algunhas pezas de gran formato, o artista presenta traballos en mármore, pedra, madeira, barro ou bronce que dialogan entre si nun espazo que se identifica co silencio.
Tamén pode ollar o espectador diversas fotografías con imaxes de monumentos públicos que Xosé Cid ten espallados pola xeografía galega e diversos debuxos e bocetos que serviron de preludio para o seu posterior traballo.
Xosé Cid é un dos escultores galegos esenciais no panorama artístico do país e esta exposición convértese nun elemento esencial da oferta cultural ourensá. A mostra poderá visitarse entre o 11 de abril e o 2 de xuño de 2024.