A 41ª Copa Deputación de Judo pechou a tempada con 200 participantes
A tempada 2024-2025 do judo ourensán chegou ao seu fin o pasado sábado, 28 de xuño, coa celebración da última xornada da 41ª Copa Deputación de Judo. A competición celebrouse na pista central do Pazo Paco Paz e reuniu a 200 judokas de toda a provincia, consolidándose un ano máis como a cita máis importante da tempada para este deporte.
A Copa Deputación, organizada pola Delegación Ourensá de Judo e patrocinada integramente polo Servizo de Deportes da Deputación de Ourense, é a principal canteira de novos judokas e supón a primeira experiencia competitiva para moitos dos participantes. As categorías abarcan desde Chupetín ata a categoría xuvenil, mantendo a categoría OPEN, que permite a participación conxunta de rapaces e rapazas.
Nesta edición participaron deportistas de clubs da cidade e das escolas de Cambeo, Inmaculada, Allariz e Baños de Molgas. A pesar das altas temperaturas, a última xornada contou cunha alta participación e cun bo nivel en todos os combates.
Antes do inicio da competición, os tres dúos que participaron no Open do Mediterráneo de Jiu Jitsu —Alicia Pazo e Álvaro Seoane, Carla Seoane e Beatriz Nesi, e Silvia Iglesias e Alicia Caneiro— ofreceron unha demostración do seu traballo internacional.
A Copa Deputación disputouse en tres xornadas puntuables, o 1 de marzo, o 26 de abril e o 28 de xuño, e a asistencia foi clave para a clasificación final. O deputado provincial Rosendo Fernández foi o encargado de entregar as medallas aos campións e a todos os participantes de cada categoría.
Con esta edición cúmprense xa 41 anos dunha das competicións formativas máis consolidadas da provincia, ideada polo Mestre 8º Dan de Judo, Manuel Montero.