A Área Sanitaria de Ourense convoca os seus tradicionais concursos de Nadal
A Área Sanitaria de Ourense, Verín e O Barco de Valdeorras convoca un ano máis os seus tradicionais concursos de tarxetas de nadal, para fillos ou netos dos traballadores, e a quinta edición do concurso de decoración de espazos e unidades dos seus centros sanitarios con motivo das festas navideñas. Estes dous concursos non só buscan embelecer os espazos de traballo, senón tamén fortalecer os lazos entre os profesionais sanitarios e as comunidades que representan.
Concurso de tarxetas de Nadal
A Área Sanitaria de Ourense, Verín e O Barco de Valdeorras anunciou a apertura do seu tradicional Concurso de Tarxetas de Nadal, dirixido ás fillas, fillos, netas ou netos dos traballadores dos centros sanitarios da provincia. Esta iniciativa ten como obxectivo fomentar a creatividade infantil e celebrar o espírito do Nadal en familia, destacando o importante papel desenvolvido por cada un dos profesionais da saúde que traballan nos nosos centros.
O concurso está aberto a nenas e nenos de entre 1 e os 15 anos, divididos en tres categorías de idade: de 1 a 4 anos, de 5 a 9 anos e de 10 a 15 anos. Os participantes deberán presentar un debuxo no reverso dunha tarxeta que se pode atopar en todas as unidades de información dos hospitais públicos de Ourense, que deberá incluír obrigatoriamente os datos do menor participante: nome, apelidos, idade, centro de traballo do familiar e un teléfono de contacto. A temática do deseño debe estar relacionada co Nadal e o traballo dos profesionais sanitarios nos hospitais, centros de saúde e PACs da comarca correspondente.
As tarxetas poderán entregarse do luns 2 de decembro ao venres 13 de decembro de 2024 nas unidades de información do Hospital Universitario de Ourense (Novo Hospital, Cristal, Nai, Piñor, e Centro de Especialidades), no Hospital Público de Verín, no Hospital Público de Valdeorras ou nos centros de saúde e PACs da área sanitaria.
Un xurado composto por traballadores xa xubilados e representantes de asociacións de pacientes seleccionarán tres gañadores por categoría, que recibirán un diploma como recoñecemento á súa creatividade.
As tarxetas seleccionadas serán expostas nos vestíbulos principais do Hospital Cristal, Hospital Público de Verín e Hospital Público de Valdeorras a partir do 17 de decembro, e o acto de entrega de premios se realizará a partir do 23 de decembro e se comunicará coa suficiente antelación aos nenos e nenas premiados.
V Concurso de decoración
O Concurso de Decoración de Nadal cumpre a súa quinta edición tendo como principal obxectivo o de levar o espírito do Nadal ao ámbito hospitalario convidando a todos os traballadores e traballadoras da área a decorar as súas unidades, consultas ou despachos con creativos e orixinais ambientes do Nadal. O concurso busca fomentar a ilusión, solidariedade e creatividade nesta época especial do ano, creando espazos decorados que reflictan a temática do Nadal e o uso de materiais reutilizables.
As unidades participantes do Hospital Universitario de Ourense e centros de saúde de a contorna deberán presentar as súas propostas decorativas en formato vídeo ou nun “book” fotográfico, cun máximo de 5 fotos. A duración máxima dos vídeos será de 1 minuto. As decoracións deben enviarse por WhatsApp ao número 680 768 159 antes do 16 de decembro de 2024. É imprescindible incluír o nome, apelidos, centro sanitario e localización do espazo decorado. Nos casos do Hospital Público de Verín e o Hospital Público de Valdeorras un xurado pasará polas unidades decoradas para avaliar as propostas presentadas.
O xurado que participa en cada hospital estará composto por representantes de traballadores xubilados e asociacións de pacientes da área, quen avaliará as decoracións en base aos seguintes criterios: temática do nadal, orixinalidade e creatividade, autenticidade dos materiais decorativos e uso de materiais reciclados. O fallo do xurado anunciarase o 19 de decembro de 2024 a través das redes sociais de Sergas Ourense. Os gañadores recibirán unha cesta de produtos do Nadal e un diploma acreditativo. A entrega de premios realizarase nun acto público, cuxa data e lugar comunicaranse previamente.