A Asociación Amigos de Otero Pedrayo convoca o III Premio de Oratoria en formato podcast
A Asociación Amigos de Otero Pedrayo vén de lanzar a convocatoria da terceira edición do seu popular Premio de Oratoria, un certame destinado ao alumnado galego de entre 15 e 25 anos. Este ano, o concurso adopta o formato de podcast, o que permite aos participantes compartir as súas ideas sobre unha ampla variedade de temas relacionados coa obra e o legado de Otero Pedrayo, así como outras cuestións de actualidade.
O concurso está aberto ao alumnado matriculado en calquera modalidade educativa, xa sexa en ESO, Bacharelato, ou en estudos de formación profesional de grao medio ou superior. Os participantes poderán presentarse de forma individual ou en grupo, e terán ata o 25 de xullo de 2025 para enviar os seus traballos.
Os temas preferentes para os traballos están relacionados co universo de Otero Pedrayo, abarcando áreas como o medio ambiente, o paisaxe, a xeografía, a historia, a etnografía, a comunicación oral, a tradición oral, a sostibilidade, o patrimonio e o territorio. Non obstante, tamén se aceptan temas vinculados directamente coa figura de Ramón Otero Pedrayo, o seu legado ou calquera asunto relacionado coa cultura e as tradicións galegas.
Os traballos deben presentarse en galego e en formato podcast, aínda que tamén poden incluir imaxes (en formato vídeo con son). Os participantes deberán enviar as súas gravacións ao correo electrónico da Asociación, amigos.de.otero.pedrayo@gmail.com, dentro do período establecido (do 10 de febreiro ao 25 de xullo de 2025).
O primeiro premio estará dotado cun ordenador portátil e 500 euros en produtos Coren. O segundo premio recibirá 500 euros en produtos Coren, mentres que o terceiro premio contará con 200 euros en produtos da mesma marca.
O concurso conta coa colaboración da Fundación Otero Pedrayo, a Xunta de Galicia e o grupo Coren.