A asociación de mulleres rurais As Abelairas de Taboadela recibe a Maleta Viajera contra a Violencia de Xénero
O subdelegado do Goberno en Ourense, Eladio Santos, entregou este martes a Maleta Viaxeira contra a Violencia de Xénero (MAVI) á asociación de mulleres rurais As Abelairas, de Taboadela. Trátase dunha iniciativa que, destacou, resulta fundamental para “promover a igualdade, achegar a lectura a todo tipo de público e fomentar a reflexión sobre a violencia de xénero”.
O acto de presentación da nova ruta celebrouse no recinto social de Rábeda e contou coa participación da xefa da Unidade de Violencia sobre a Muller da Subdelegación, María Alida Iglesias, a concelleira de Asuntos Sociais de Taboadela, Aidita Menor, e a presidenta de As Abelairas, Eva Vila.
A Maleta Viaxeira contra a Violencia de Xénero inclúe 22 obras que abordan temas de feminismo e violencia de xénero, entre elas Aquellos días en que éramos malas, de Inma López; Invisibles, de Montse Fajardo; Mi marido me pega normal, de Miguel Lorente; e Hablarán de nosotras, de Sandra Barneda. Ademais, contén Vivas para contarlo, unha publicación da Subdelegación que recolle trece relatos de mulleres que sufriron violencia de xénero.
A iniciativa busca fomentar a lectura sobre feminismo, empoderamento e autoestima, estimular o pensamento crítico, promover a participación de mulleres en situación de vulnerabilidade e sensibilizar á sociedade en xeral sobre a violencia de xénero.
“Ler sobre feminismo permítenos mirar a realidade con outros ollos, cuestionar prexuízos que aínda persisten e avanzar cara a unha sociedade máis libre”, sinalou o subdelegado, que agradeceu a As Abelairas o seu labor no fomento da vida social e cultural das mulleres en zonas rurais, destacando o seu papel clave na promoción da igualdade de xénero e na organización de actividades para a comunidade.
Desde o seu inicio en 2022 no Centro Penal de Pereiro de Aguiar, a maleta percorreu os distintos Centros de Información á Muller (CIM) da provincia, bibliotecas municipais e diversas ONG. Nesta edición, púxose a disposición das mulleres rurais e, ata o momento, foi solicitada por seis asociacións: As Abelairas (Taboadela), Os Picotiños (Esgos), Santa Isabel (Xunqueira de Espadanedo), San Miguel de Espiñoso (Cartelle), A Arracada (Vilar de Santos) e O Cruceiro (Laza).
Agora, a maleta permanecerá nesta asociación durante dous meses antes de continuar o seu itinerario cara a outros colectivos de mulleres rurais, seleccionados nesta edición, para ofrecerlles lecturas relacionadas con feminismo, estereotipos e violencia de xénero, entre outros temas.