A Asociación de Veciños do Couto recibe preto de 17.000 euros para mellorar a súa sede
A Asociación de Veciños do Couto contará cunha axuda de preto de 17.000 euros concedida pola Xunta de Galicia para levar a cabo distintas actuacións de mellora no seu local social. A achega, procedente da Consellería de Presidencia, Xustiza e Deportes, está orientada a optimizar a accesibilidade do recinto, así como a introducir melloras relacionadas coa eficiencia enerxética e a seguridade.
Estas actuacións teñen como obxectivo reforzar o papel da asociación como espazo de encontro e de servizo para a veciñanza, facilitando o desenvolvemento de actividades sociais, culturais e solidarias no barrio.
Desde a Xunta destacan a importancia de apoiar o movemento veciñal como ferramenta de dinamización social e de proximidade, ao tratarse de colectivos que coñecen de primeira man as necesidades da cidadanía e actúan como canle directa para atender as súas demandas.
No marco desta colaboración, o delegado territorial da Xunta en Ourense, Manuel Pardo, visitou este martes a sede da Asociación de Veciños do Couto, onde puxo en valor o traballo que a entidade desenvolve a prol da solidariedade, do asociacionismo, da convivencia e da inclusión de todas as persoas do barrio.