Sanidade

O acordo ten como finalidade facilitar á AECC o desenvolvemento dun programa orientado a identificar de maneira temperá as necesidades das persoas recentemente diagnosticadas de cancro e das súas familias

O Servizo Galego de Saúde e a Asociación Española Contra o Cancro en Ourense asinaron este venres un convenio de colaboración para o desenvolvemento dos programas de “Apoio e Acompañamento” e de actividades de voluntariado nos tres hospitais comarcais da provincia de Ourense. O acordó foi rubricado polo xerente da Área Sanitaria de Ourense, Verín e O Barco de Valdeorras, Santiago Camba Bouzas, e polo presidente da AECC en Ourense, Germán Rodríguez-Sáa López, que estiveron acompañados polo Subdirector de Humanización da área sanitaria, Lois López Gutiérrez, a Xerente da AECC de Ourense, Judit Vega Avelaira e a Coordinadora hospitalaria da AECC, Belén Pérez Ramos.

O convenio ten como finalidade facilitar á AECC o desenvolvemento dun programa orientado a identificar de maneira temperá as necesidades das persoas recentemente diagnosticadas de cancro e das súas familias, avaliar o malestar asociado ao diagnóstico e favorecer o acceso aos recursos máis axeitados, tanto dentro do propio hospital como fóra del.

As accións desenvolveranse de luns a venres no Hospital Universitario de Ourense, no Hospital de Verín e no Hospital de Valdeorras, en horario de 09:30 a 14:30 horas, para garantir unha atención próxima e inmediata no ámbito hospitalario.

A través deste acordo, o SERGAS comprométese a facilitar o acceso e a permanencia no centro ao persoal e voluntariado da AECC, habilitar un espazo para a realización das actividades e promover a coordinación efectiva cos equipos asistenciais, de xeito que as actuacións non interfiran no funcionamento habitual dos servizos. Pola súa banda, a AECC contará con persoal propio cualificado para o programa de apoie acompañamento, que realizará funcións como: detectar e clasificar necesidades, priorizar intervencións (psicolóxicas, sociais e informativas), orientar cara ao recurso máis axeitado e informar sobre servizos dispoñibles, coordinándose con unidades e profesionais do ámbito hospitalario (oncoloxía, psicooncoloxía, orientación social, enfermería de enlace, entre outros).

A intervención de apoio e acompañamento terá, con carácter xeral, unha duración máxima de unha ou dúas sesións, coa finalidade de derivar, cando corresponda, a outros servizos do hospital, da AECC ou a recursos externos, segundo o nivel de distrés e as necesidades detectadas.

Ademáis, contémplanse actividades de voluntariado destinadas a mellorar o benestar durante o proceso hospitalario, entre as que destacan o acompañamento a pacientes e familiares, apoio emocional, animación e entretemento, guía hospitalaria e apoio en xestións, así como comunicación de casos que precisen intervención especializada para a súa derivación.

O acordo entrou en vigor este mesmo venres e terá un ano de duración, prorrogable por un ano máis mediante acordo expreso. Para o seu desenvolvemento, crearase unha comisión mixta paritaria de seguimento e control do convenio. Ademais, segundo recalcan os responsables de sanidade, o acordo non supón compromiso de gasto para o SERGAS.