A Asociación Española de Paisaxismo organiza unha xornada sobre xardíns efémeros en Allariz
Allariz acollerá este venres 3 de outubro unha xornada profesional organizada pola Asociación Española de Paisaxismo (AEP) baixo o título “Imaginación en flor: o arte do xardín efémero”. A AEP, que forma parte do xurado do Festival Internacional de Xardíns de Allariz, é responsable de seleccionar cada ano os proxectos participantes e de decidir o Premio Técnico, un recoñecemento á calidade e innovación dos deseños presentados.
O programa desenvolverase no Salón de Actos do Fogar do Maior de Allariz e combinará relatorios, mesas redondas e experiencias prácticas sobre o xardín efémero. A xornada comezará ás 09:00 horas coa presentación institucional a cargo da alcaldesa, Cristina Cid, e do presidente da AEP, Iñaki Viñuela. A continuación, o director do festival, Francisco García, repasará a filosofía e a historia do certame.
Entre os participantes da mañá destaca o paisaxista Íñigo Segurola, socio de LUR Paisaje, que falará sobre o proxecto “Xardín de xardíns”. Tamén se presentarán as empresas patrocinadoras Rain Bird, Makita e Veraleza, e ás 12:00 horas, Tino Feijoo explicará o proceso de trasladar un deseño do papel ao terreo. A sesión incluirá unha mesa redonda sobre a importancia dos festivais na creatividade e na formación en paisaxismo, con representantes de universidades e escolas especializadas, e a entrega do Premio Xardín Galego de AGAEXAR.
Pola tarde, a partir das 15:30 horas, José Souto ofrecerá un relatorio sobre como deseñar un proxecto gañador, seguido de Sinda Dávila, que abordará o valor do festival como recurso creativo. A xornada concluirá cun Pecha Kucha de estudantes de paisaxismo presentado por Adriana Villar e Lara Caamaño, e cunha visita guiada ao Festival Internacional de Xardíns de Allariz – Edición 2025 ás 17:30 horas.
Ademais, continúa aberto o prazo de recepción de candidaturas para a edición 2026 do festival, que levará como lema “Os xardíns como espazos de liberdade”, invitando a deseñadores, arquitectos paisaxistas e artistas de todo o mundo a presentar proxectos innovadores que exploren os xardíns como espazos de liberdade e creatividade. O prazo de presentación de propostas finaliza o 30 de novembro de 2025.