A Asociación Xuvenil Amencer presenta unha nova edición da Operación Quilo
A Asociación Xuvenil Amencer presentou este mércores a campaña solidaria “Operación Quilo 25”, baixo o lema “Historias de compromiso e solidariedade”, que botou a andar xa o pasado día 17 de novembro. Trátase dunha iniciativa que leva 39 anos desenvolvéndose en Ourense arredor das datas de Nadal, co obxectivo de recoller quilos de alimentos, xoguetes e roupa para as familias máis empobrecidas da cidade.
Para facilitar as doazóns, a Asociación está a colocar petos en preto de 300 comercios e salóns de peiteado, así como caixas identificadas coa pegatina da Operación Quilo en sedes sociais de entidades, organismos e colexios. Ademais, organízanse diferentes eventos culturais e deportivos para recadar fondos que permitan mercar os alimentos necesarios para máis de 1.000 familias ourensás. A ONG Cáritas, con presenza en todos os barrios de Ourense, será a encargada de repartir todo o recollido en Amencer nos días previos ao Nadal.
Na campaña do ano pasado participaron máis de 200 comercios, instalándose 74 puntos de recollida con 83 caixas para xuntar alimentos e xoguetes. O resultado foi a recollida de 8.159 quilos de alimentos, 4.200 quilos de xoguetes e 6.200 quilos de roupa, ademais de 9.809 euros en donativos, que se destinaron integramente á compra de alimentos para as familias necesitadas.