A candidatura da Ribeira Sacra a Patrimonio Mundial entra na súa recta final
A Xunta de Galicia deu un novo paso na tramitación da candidatura da Ribeira Sacra a Patrimonio Mundial, nunha fase que entra xa no seu tramo final e cuxo veredicto se coñecerá na segunda metade de 2026. Unha delegación formada por representantes da Consellería de Cultura, Lingua e Xuventude e do Ministerio de Cultura mantivo en París un encontro de traballo cun comité de expertos da Unesco para achegar respostas e completar aspectos do expediente remitido o pasado mes de xaneiro.
Tras a reunión, o director xeral de Patrimonio Cultural, Ángel Miramontes, que coordinou a comitiva galega, asegurou que “as sensacións seguen a ser moi boas e fan confiar na consecución desta distinción en 2026”. Durante o encontro, expuxéronse novamente os “atributos especiais e únicos” que caracterizan a Ribeira Sacra e que, segundo Miramontes, “a fan a xusta merecedora deste recoñecemento internacional pola Unesco”.
A candidatura, que abrangue 26 concellos das provincias de Lugo e Ourense, destaca a configuración da paisaxe a través do uso da auga, un modelo que, segundo o representante da Xunta, non está suficientemente presente na actual Lista de Patrimonio Mundial. Esa singularidade foi tamén comprobada sobre o terreo polo observador enviado por Icomos, cuxo informe, lembrou Miramontes, complementa o expediente inicial.
Durante a reunión en París puideron aclararse cuestións derivadas de todos os informes recompilados, que agora deberán ser desenvolvidas con maior detalle. A documentación definitiva deberá estar presentada antes do 27 de febreiro de 2026, o prazo fixado pola Unesco para completar o proceso.
Miramontes insistiu en que os próximos pasos son “claves” para a resolución final e agradeceu o “apoio en todo momento” do Ministerio de Cultura, así como da cidadanía e das institucións locais dos 26 municipios implicados. “O camiño que nos queda é crucial e precisamos da colaboración e do empurre de todos”, subliñou.
Durante os últimos anos, a Xunta destinou preto de 8 millóns de euros á conservación e posta en valor de máis de 40 bens patrimoniais situados na Ribeira Sacra, tanto en Lugo como en Ourense. Ese investimento permitiu executar máis de 90 intervencións, en solitario ou en colaboración con concellos e outras entidades, en inmobles e enclaves de gran relevancia, como igrexas, mosteiros, museos, castros ou xacementos romanos.
Segundo Miramontes, este esforzo sostido contribuíu a que o territorio sexa hoxe “máis vivo, máis coidado e máis recoñecido”, e manifestou a súa confianza en que esa tendencia se reforzará “cando academos este merecido recoñecemento internacional”.