A Casa dos Poetas e a Torre da Homenaxe amplían os seus horarios de visitas
A partir deste mes de abril, os espazos atendidos polo persoal da Fundación Curros Enríquez, como a Casa dos Poetas e a Torre da Homenaxe en Vilanova dos Infantes, amplían o seu horario pola tarde, abrindo unha hora máis, ata as 19.00 horas.
A Casa dos Poetas terá o seguinte horario: de martes a venres, de 10.00 a 14.00 horas e de 16.00 a 19.00 horas, e os sábados de 11.00 a 14.00 horas e de 16.00 a 19.00 horas. Permanecerá pechada os domingos e festivos.
A Torre medieval de Vilanova dos Infantes cumprirá o seguinte horario: sábados, domingos e festivos, de 11.00 a 14.00 horas e de 16.00 a 19.00 horas. Desde a torre partirán as visitas guiadas polo conxunto medieval de Vilanova dos Infantes, que, ademais de incluir o acceso á propia torre, ofrecen un percorrido guiado polas rúas da vila ata a Cova de San Vivián, onde tamén se atopa a sala etnográfica dos zapateiros. As visitas á torre realizaranse nos días de apertura ás 12.30 e ás 16.30 horas, cunha duración aproximada de 30 minutos. Pola súa banda, as visitas guiadas polo burgo medieval, que inclúen os espazos da torre e da cova, saírán ás 10.30 e ás 18.30 horas, cunha duración aproximada dunha hora. Todas as visitas parten da Torre da Homenaxe, e recoméndase a reserva previa no teléfono 646 026 421.
Dado que nesta tempada a atención aos grupos escolares ocupa gran parte do tempo do persoal da Fundación Curros Enríquez, as visitas á Torre das Campás do mosteiro de Celanova e as visitas culturais pola vila quedarán dispoñibles baixo demanda de martes a sábado, a través do contacto habitual, para acordar un horario que favoreza ao visitante e que non se vexa afectado pola atención escolar.
En canto aos espazos a visitar de forma libre neste concello, destacan especialmente o xacemento castrexo de Castromao e o entorno de Pontefreixo, onde se pode ver a ponte romana e dar un pequeno paseo ata os petroglifos. Ambos os lugares están perfectamente sinalizados para poder acceder desde a propia vila de Celanova e ofrecen paneis explicativos dos puntos de maior interese. Tamén se pode realizar a visita ao Mosteiro de San Salvador de Celanova, tanto de forma libre como guiada, a través da oficina de turismo do Concello de Celanova.