A celebración do Entroido provocará cortes de tráfico na cidade de Ourense entre este xoves e o mércores da próxima semana
A Policía Local do Concello de Ourense deu a coñecer o dispositivo especial de tráfico que se aplicará na cidade con motivo da programación do Entroido 2026, que inclúe desfiles, actuacións musicais e diferentes actividades na vía pública ao longo da próxima semana.
As primeiras restricións comezarán este xoves, 12 de febreiro, no centro histórico, onde se prevén limitacións de circulación debido ás actuacións de DJs na Praza Maior e na Praza de Santa Eufemia, así como polo percorrido de charangas por distintas rúas da zona.
O venres 13, con motivo dos desfiles escolares, rexistraranse cortes puntuais entre as 11.00 e as 13.00 horas nas rúas Sáenz Díez, Curros Enríquez, Pardo de Cela e Xesús Pousa. Ademais, continuarán as restricións no casco histórico polas actividades musicais previstas.
O sábado 14, a partir das 15.00 horas, quedará pechada ao tráfico a rúa do Progreso, no tramo da Alameda comprendido entre a baixada á Praza de Abastos e a rúa Concordia. Permitirase o paso por Parada Justel ata as 22.00 horas. Este corte manterase de forma continuada nos días seguintes ata a retirada da carpa instalada na Alameda, prevista para a madrugada do martes ao mércores. Durante esa xornada tamén seguirán as limitacións no centro histórico polas actuacións e a animación musical.
O domingo 15, desde as 14.30 horas, cortarase o acceso ao circuíto do desfile, que discorrerá pola avenida de Otero Pedrayo, Curros Enríquez, Xoán XXIII, Progreso e Parada Justel. O tramo de Progreso permanecerá pechado ata que remate a actuación de King África na Alameda.
O luns 16, ás 19.15 horas, pecharase o acceso ao percorrido do desfile de Frei Canedo, que afectará á Ponte Romana, á avenida das Caldas, a Eulogio Gómez Franqueira e Xesús Pousa. No que respecta ao corte de Progreso, permitirase novamente a circulación por Parada Justel ata as 22.00 horas, nas mesmas condicións que o sábado. Tamén se manterán as restricións no centro histórico pola animación musical.
O martes 17, o paso por Parada Justel no marco do peche da rúa do Progreso só estará autorizado ata as 18.00 horas.
Por último, o mércores 18, ás 00.00 horas, procederase ao corte da rúa Curros Enríquez, fronte á Subdelegación do Goberno, con motivo do tradicional Enterro da Sardiña.
Desde a Policía Local recoméndase á cidadanía planificar os seus desprazamentos con antelación e atender á sinalización e ás indicacións dos axentes durante o desenvolvemento das celebracións.