A CEO reclama avances inmediatos na A-56 e na Variante Norte de Ourense
A Confederación Empresarial de Ourense advirte da “ausencia de prazos claros e compromisos concretos” respecto ás principais infraestruturas viarias da provincia, especialmente a Autovía A-56 (Ourense–Lugo) e a Variante Norte de Ourense.
A organización denuncia que, a pesar dos anos de espera, os proxectos seguen sen un calendario definido. Sinalan que treitos como o de Eirasvedras–Quintela, en obras desde hai máis de tres anos, non teñen data de remate, mentres que o de Quintela–A Casilla, clave para a continuidade da Variante Norte, leva máis de 20 meses sen aprobación definitiva nin licitación.
“A falta de avances e os atrasos constantes supoñen un freo para o desenvolvemento económico de Ourense, a competitividade empresarial e a cohesión territorial”, destacan desde a CEO.
Segundo a entidade, estas infraestruturas son fundamentais para mellorar a mobilidade, vertebrar o territorio e evitar o illamento da provincia dentro de Galicia. Subliñan que, sen comunicacións modernas, as empresas ourensás compiten en desvantaxe fronte a outras rexións.
A CEO insiste en que Ourense arrastra décadas de marxinación en materia de investimentos en infraestruturas e anuncia que seguirá vixiante ante calquera atraso ou falta de compromiso que afecte ao desenvolvemento viario. “Ourense precisa feitos, non anuncios”, conclúen.