A CHMS mellorará a capacidade hidráulica do río Arnoia e do regato da Abelleira en Cartelle e Celanova
A Confederación Hidrográfica do Miño-Sil (CHMS) continuará nos próximos días coas tarefas de conservación e mellora dos cauces da demarcación para favorecer a adaptación ao cambio climático e a prevención do risco de inundacións. Deste xeito, a próxima semana arrancarán os traballos para mellorar a capacidade hidráulica do río Arnoia e do regato da Abelleira ao seu paso polos municipios ourensáns de Cartelle e Celanova.
A inversión prevista é próxima aos 60.000 euros, cofinanciados polo Fondo Europeo de Desenvolvemento Rexional (FEDER), cunha achega do 60% do orzamento, no marco do Programa Operativo Plurirregional de España 2021-2027.
Intervirase nun tramo de 2,5 quilómetros onde se detectaron árbores secas en pé, árbores tumbadas e inclinadas con risco de caída sobre o dominio público hidráulico e a zona de servidume, así como restos de madeira que forman tapóns e reducen a capacidade de desaugue.
Estas actuacións buscan mellorar a capacidade hidráulica do río para minimizar o risco de inundacións na contorna.
Os traballos incluirán a tala, troceado, apilado e retirada das árbores secas e inclinadas con risco de caída, así como desbroces selectivos de matogueira perimetral, poda e clareo de ramas baixas para mellorar a composición da vexetación de ribeira.
Ademais, levaranse a cabo tarefas de restauración hidrolóxico-forestal para controlar a erosión e protexer as marxes en zonas concretas, aplicando técnicas non invasivas e ambientalmente sostibles.
Estes traballos, explica Quiroga, “foron programados co obxectivo de conservar e restaurar a hidromorfoloxía natural dos cauces para mellorar a súa resiliencia e adaptación ao cambio climático”.
Estas intervencións forman parte do Obxectivo Específico 2.4, destinado a favorecer a adaptación ao cambio climático e a prevención do risco de catástrofes, así como a resiliencia, tendo en conta os enfoques baseados nos ecosistemas, e están suxeitas ao cumprimento da Condición Favorecedora 2.4 “Marco eficaz de xestión do risco de catástrofes”, conforme ao Regulamento (UE) 2021/1060 do Parlamento Europeo e do Consello.