A comunidade senegalesa en Ourense celebrou o Magal Touba
A comunidade senegalesa de Ourense convidou este xoves á veciñanza a participar na súa festividade máis importante, o Magal Touba, cunha xornada no Campo da Feira chea de música, actividades e gastronomía tradicional. Preto de 400 persoas procedentes de Senegal, residentes na cidade, comparten así cos ourensáns unha celebración que, segundo explica Talla, un dos organizadores, “é un día moi especial para nós, xa que celebramos a Magal Touba, que se chama así porque a celebración principal ten lugar na cidade senegalesa de Touba”.
O Magal Touba celébrase en todo o mundo na honra de Cheikh Ahmadou Bamba, teólogo musulmán de Senegal, e constitúe unha cita de gran valor cultural e relixioso para a comunidade.
A festa contou coa visita do alcalde de Ourense, Gonzalo Pérez Jácome, e da concelleira de Artes e Festexos, Noa Rouco. O Concello colabora con este encontro, como tamén o fai con outras comunidades estranxeiras asentadas na cidade, entre elas as de Colombia ou Venezuela.