A Deputación de Ourense destinará 100.000 euros a preto de 60 asociacións veciñais da provincia
A Xunta de Goberno da Deputación de Ourense aprobou esta semana axudas por un total próximo aos 457.959 euros a través de nove expedientes diferentes. Entre elas, destínanse 100.000 euros ao funcionamento e mantemento de 58 asociacións veciñais de toda a provincia.
O presidente provincial, Luis Menor, destacou que se trata de “unha convocatoria que manteremos e seguiremos impulsando dada a importancia do movemento veciñal na nosa provincia”.
Ademais, a Deputación aprobou axudas por valor de case 300.000 euros (297.959,45 euros) destinadas a seis concellos: Castrelo de Miño, Cenlle, Piñor, Vilar de Santos, Vilariño de Conso e Cortegada. Estes fondos dirixiranse a proxectos de mellora do alumeado público, pavimentación, eficiencia enerxética e novos equipamentos, segundo explicou Menor.
Por outra banda, asignáronse 62.400 euros a entidades, entre as que se inclúen o Club de Fútbol Cented Academy, para gastos de funcionamento, e a Fundación Ramón González Ferreiro, para a fase 2 da rehabilitación da finca Valverde, xestionada pola propia fundación.
Menor tamén anunciou que mañá o Goberno provincial presentará ante a Comisión de Facenda, para o seu debate no Pleno de outubro, un expediente de modificación de crédito por máis de 6,2 millóns de euros.
Sobre esta modificación, explicou que “a práctica totalidade” —máis de 6,1 millóns— distribuíuse “seguindo criterios obxectivos e homoxéneos”, destinados a axudar aos concellos afectados polos incendios deste verán, prestar servizos municipais e atender necesidades especiais de financiamento.
O presidente aclarou que esta medida “axústase ás limitacións impostas polas normas fiscais reactivadas polo Goberno central en 2024”, o que implica que dos 24 millóns de euros de superávit de tesourería só se poden empregar algo máis de 6 millóns. “Con esta cantidade limitada non é posible acadar outros ámbitos como a colaboración con entidades”, subliñou Menor.