A Deputación de Ourense e a AECC colaborarán para promover espazos sen fume e hábitos de vida saudables
A Deputación de Ourense e a Asociación Española Contra o Cancro (AECC) reforzaron este luns a súa cooperación coa sinatura de dous convenios orientados a impulsar a prevención do cancro e a ampliar a rede de espazos libres de fume na provincia. O presidente provincial, Luis Menor, visitou a sede da entidade para formalizar os documentos xunto ao presidente da asociación, Germán Rodríguez-Sáa.
Durante o encontro, Menor destacou a evolución recente da AECC en Ourense, que conta cunha sede reformada con apoio da Deputación e experimentou un notable crecemento nos últimos anos, duplicando o número de socios e triplicando o de voluntarios. O presidente provincial insistiu na importancia de que a institución chegue “a onde non chegan as outras administracións” e subliñou que a AECC forma parte das entidades coas que o goberno provincial mantén unha colaboración activa.
Menor tamén puxo o foco na necesidade de garantir a igualdade de acceso aos servizos en toda a provincia, asegurando que o labor de ambas institucións busca “salvagardar os dereitos de todos os cidadáns con independencia de onde vivan”. Ademais, agradeceu á asociación o seu apoio á reivindicación para recuperar as paradas de tren na Gudiña, unha situación que, ao seu xuízo, supón un “ataque á saúde da provincia” ao dificultar os desprazamentos de pacientes oncolóxicos.
Pola súa banda, Rodríguez-Sáa valorou que estes convenios permitirán “incrementar a nosa política de prevención dentro dun plan estratéxico provincial” e avanzar no obxectivo de “chegar a todos os municipios sen distinción”, algo que atribuíu ao respaldo da Deputación, á que definiu como “institución de todos os ourensáns e ourensás”. O presidente da AECC destacou tamén a concesión da primeira axuda da Fundación Científica da AECC para un proxecto de investigación realizado desde Ourense, un proxecto que cualificou de “histórico”.
O primeiro dos acordos asinados este luns formaliza a colaboración da Deputación na iniciativa “Espazos sen fume”. Con el, determínanse como áreas libres de tabaco os arredores do parque infantil de Cachamuíña, no Pereiro de Aguiar; as zonas verdes do Salgueiral, en Leiro; e a contorna da depuradora en Muíños. A institución provincial promoverá a normativa necesaria para prohibir fumar nestes espazos, mentres que a AECC se encargará dos recursos para a súa sinalización.
O segundo convenio, pola súa banda, reforza o apoio da Deputación ás accións da AECC orientadas á prevención do cancro, á promoción de hábitos de vida saudables e á difusión de información entre a poboación. O acordo inclúe tamén a colaboración en actividades dirixidas a persoas afectadas pola enfermidade. A maiores, a institución provincial comprométese a trasladar aos seus usuarios os servizos que ofrece a asociación para asegurar que chegan a toda a provincia.