A Deputación de Ourense, finalista nos Premios do Congreso de Innovación e Servizos

OurenseXa
A Deputación de Ourense é a única finalista galega de entre as 36 administracións seleccionadas dun total de 170 candidaturas presentadas
pazo-provincial-deputacion-de-ourense-recurso
Pazo Provincial da Deputación de Ourense
25 Xuño 2024

O Congreso Nacional de Innovación e Servizos, CNIS 2024, cuxo lema é “Empoderando o Futuro: Administracións máis Dixitais, Intelixentes, Colaborativas e Proactivas”, está destinado a impulsar a Innovación Pública e contará con máis dun milleiro de asistentes de todos os niveis das administracións con responsabilidades na innovación e a transformación dixital das mesmas, con máis de 120 relatorios que se desenvolverán de maneira simultánea nas 4 salas de conferencias na Nave, o centro de innovación de referencia do Concello de Madrid.

A gala de entrega, o día 26 ás 13:30, será o broche ao CNIS 2024, momento no que a Deputación de Ourense coñecerá se finalmente supera ao Ajuntament de Barcelona e á Comunidad de Madrid e se alza co “Premio ao mellor caso de proactividad administrativa” . Cabe destacar que este ano presentáronse máis de 170 candidaturas ás 12 categorías que propuxo a organización e a Deputación de Ourense a única administración galega finalista nalgunha candidatura do certame.

Área de Benestar da Deputación de Ourense, simplificación, proactividade e transformación dixital orientada á cidadanía
Desde a Deputación de Ourense presentouse baixo o título “Área de Benestar: administración electrónica multicanle orientada á cidadanía” unha candidatura aos CNIS2024 na Modalidade “Premio ao mellor caso de proactividad administrativa”, sendo finalista dos mesmos.
A Área de Benestar da Deputación de Ourense iniciou hai anos un proceso de cambio e transformación dixital co obxectivo de lograr unha administración provincial máis proactiva con políticas sociais máis simples e accesibles dixitalmente para toda a cidadanía.

Pretendíase realizar deste xeito unha evolución permanente na forma de relacionarse coas persoas para poder ofrecer uns programas públicos máis dixitais que, en constante evolución, lograsen ano a ano ser máis simples, máis áxiles, máis próximos, máis fáciles, máis inclusivos, máis rápidos e máis igualitarios.

A administración provincial respondía así tamén ao obxectivo estratéxico da Unión Europea centrado na dixitalización e modernización das administracións públicas a través da mellora na accesibilidade dos servizos públicos dixitais aos cidadáns, a redución da fenda dixital e a mellora da eficiencia e a eficacia dos empregados públicos.

Unha administración electrónica inclusiva na que “ninguén debe quedar atrás”

O fundamento que rexeu a metodoloxía da transformación realizada pola Área de Benestar foi que todo proceso de dixitalización na administración, e máis se estamos a falar de políticas sociais, tiña que facerse desde o principio polo que todas as persoas deben poder gozar das oportunidades que ofrece a dixitalización e ninguén debe quedar atrás, principio contido na “Declaración de Berlín sobre a sociedade dixital e a administración dixital baseada en valores”.

Neste proceso a área de Benestar focalizou non só a tecnoloxía, e a normativa que regula os diferentes procedementos administrativos e programas provinciais de axudas sociais, senón a configuración dun sistema que permitise que os cidadáns en exclusión dixital puidesen tramitar as súas solicitudes de maneira alternativa a unha única canle de administración electrónica, pero que obtivesen os mesmos dereitos nos mesmos prazos, e da maneira máis eficaz e eficiente posible, en termos de carga administrativa, desprazamentos, prazos de resolución e de pago.

A área de Benestar xestiona, de media, máis de 5000 expedientes anuais de solicitudes sociais (Teleasistencia provincial,Termalismo Social provincial, Axudas ao fomento da natalidade, Programa de Emprendedoras no medio rural …) , e o Sistema multicanle é a clave da minoración para o cidadán da carga administrativa, dos desprazamentos, dos prazos de resolución e pago das axudas.

Inclusión dixital: administración electrónica provincial multicanle

Baixo a prioridade de lograr unha administración dixital máis simple e accesible a todas as persoas, a Área de Benestar configurou un sistema para que as persoas que non dispoñen de medios e/o de coñecementos tecnolóxicos, ou como nunha porcentaxe alta de casos, nos que non poidan relacionarse coa administración electrónica de maneira on-line por carecer de certificado dixital ou medio de autenticación alternativo, poidan obter o mesmo dereito que os cidadáns dixitais, isto significa que o obteñan nos mesmos prazos e coa menor carga administrativa.

Así, a transformación dixital da área de Benestar baseouse en establecer un sistema multicanle no que a administración provincial se adaptase ás “capacidades dixitais” de cada persoa, establecendo diferentes canles para diferentes capacidades.

A administración provincial fai compatible deste xeito a atención á cidadanía dixital coa atención aos colectivos que máis sofren a fenda dixital; todas as persoas, con independencia do seu perfil tecnolóxico e as súas capacidades dixitais, teñen a súa vía de atención diferente, pero todas con igual dereito en prazos de resolución.

Ata 2023 existían catro vías ou canles de atención: unha primeira canle 100% dixital que non require presenza nin desprazamentos da cidadanía; dúas diferentes canles presenciais para cidadáns que sofren fenda dixital severa; e unha canle híbrida, dixital e presencial, para aquelas persoas que sofren fenda dixital nalgún aspecto. En 2023 incorporouse unha nova canle, a “ firma por voz”, na que para todas as persoas, a súa voz é a súa firma.

Proactividade: a administración electrónica vai onde está o cidadán
Coa incorporación da canle por voz a administración provincial deu un salto cualitativo moi importante. Agora a Deputación xa non está condicionda na atención ao “cidadán en exclusion dixital” pola atención desde o espazo físico dunha administración. É dicir: o cidadán non ten que ir á administración, pode a administración ir onde está o cidadán.
Ata a implementación desta solución, a persoa que non podía identificarse a través dun certificado dixital tiña que ir fisicamente ao rexistro electrónico dunha administración local para ser identificado de forma presencial e presentar unha solicitude normalizada en papel , aínda que os datos contidos no mesmo xa se transmitiran dixitalmente con anterioridade por algunha das vías do Sistema Multicanle, pero, o procedemento administrativo requiría a súa identificación presencial para completar o proceso.

Agora, pudendo identificarse e realizar a firma biométrica vogal desde calquera lugar, abríronse moitas posibilidade de atención ao cidadán desde outros ámbitos, xa que desde calquera lugar pode presentar a solicitude e asinar. O primeiro paso nesta proactividade da administración provincial foi facer un acordo co CHUO – Complexo Hospitalario de Ourense para que desde os hospitais do SERGAS en Ourense, Verín e Valdeorras os cidadáns puideran presentar desde as súas habitacións solicitudes administrativas como as do Programa ChegOU.

0.18604493141174