A Deputación de Ourense impulsará o desenvolvemento sostible do sur de Ourense e Valdeorras con 14,5 millóns de euros
A Deputación de Ourense destinará 14,5 millóns de euros, con financiación europea, a dous plans de desenvolvemento sostible que se executarán nos nove municipios da comarca de Valdeorras e na área funcional sur da provincia, formada por Barbadás, San Cibrao das Viñas e Pereiro de Aguiar.
O presidente provincial, Luis Menor, afirma que estes son “os proxectos de maior envergadura que a Deputación de Ourense xestionará con fondos europeos”, destacando que a captación de recursos na Unión Europea é un “eixe fundamental do noso Goberno para profundar na política de desenvolvemento provincial”.
Os plans, denominados Plans de Acción Integrados (PAI), céntranse en tres liñas de traballo principais: a mellora ambiental, o fomento da dimensión económica e a competitividade das empresas, e a mellora social dos territorios seleccionados. Segundo a resolución da Dirección Xeral de Fondos Europeos, a Deputación contará co 60% da financiación de ambos plans, o que supón máis de 4,3 millóns de euros para cada proxecto. Cada iniciativa parte dun orzamento superior a 7,2 millóns de euros, aínda que inicialmente se calculou unha inversión de 10 millóns de euros por plan.
O PAI Valdeorras beneficiará aos nove municipios da comarca con actuacións planificadas ata 2029, destinadas a mellorar o seu desenvolvemento económico, turístico, cultural, social e enerxético. Inclúe tres programas principais: “Coopera Valdeorras”, comprometido coa cooperación supramunicipal; “Valdeorras Cohesionada”, orientado a mellorar a calidade de vida dos cidadáns; e “Valdeorras Sostible”, con especial atención á conservación do medio ambiente, un aspecto que cobra maior relevancia tras os incendios do verán.
Pola súa banda, o plan da área funcional Ourense Sur centrará as súas actuacións en Barbadás, San Cibrao das Viñas e Pereiro de Aguiar, os municipios do área metropolitana con maior dinamismo demográfico, social e económico. Ademais, estas localidades concentran as áreas empresariais máis importantes da provincia, polo que o plan pretende potenciar o seu desenvolvemento integral.