A Deputación de Ourense mobiliza 1,6 millóns en cooperación cos concellos e apoio ás entidades sociais e deportivas
A Xunta de Goberno da Deputación de Ourense deu luz verde na súa última sesión a un total de 22 asuntos que supoñen unha mobilización económica superior aos 1,6 millóns de euros. A maior parte destes fondos destínanse á cooperación cos concellos da provincia e ao reforzo das políticas de apoio ás entidades sociais e deportivas.
O provincial, Luis Menor, incidiu en que os acordos adoptados responden ás principais liñas de actuación da institución: a colaboración directa cos municipios e o respaldo ás organizacións que traballan no ámbito social.
Unha parte destacada do orzamento, que rolda os 934.000 euros, diríxese a financiar 20 actuacións municipais repartidas por distintos puntos da provincia, entre eles Carballeda de Avia, Allariz, Leiro, Calvos de Randín ou A Rúa.
Os proxectos abranguen melloras en estradas, redes de abastecemento e saneamento, acondicionamento de espazos públicos e rehabilitación de instalacións culturais e sociais, actuacións que buscan mellorar os servizos básicos e a calidade de vida da veciñanza.
Entre as intervencións máis relevantes figura a achega de 250.000 euros para a construción dun fogar residencial na Peroxa, orientado á atención das persoas maiores no rural. Tamén destaca a actuación prevista na Pobra de Trives, cun investimento próximo aos 100.000 euros para renovar o firme dunha vía de acceso a varias localidades, mellorando así a seguridade e a circulación.
Outro dos eixos da sesión foi o impulso ao tecido social e deportivo, cun investimento global de 680.000 euros. Neste apartado sobresae a convocatoria de axudas para entidades sociais, dotada con 600.000 euros, o que representa un incremento significativo respecto ao ano anterior.
Estas subvencións están destinadas a financiar iniciativas promovidas por asociacións e fundacións sen ánimo de lucro centradas na atención a colectivos vulnerables e na mellora da calidade de vida da poboación.
No ámbito deportivo, a Deputación mantén unha liña de 80.000 euros para apoiar a organización de eventos, como carreiras, torneos ou andainas, co obxectivo de fomentar a práctica deportiva en toda a provincia.
Desde a institución destacan que este conxunto de medidas tradúcese en investimentos directos nos municipios e en máis recursos para o ámbito social. A Deputación reafirma así o seu papel como administración de proximidade, orientada a apoiar aos concellos e a reforzar o benestar da cidadanía.