A Deputación de Ourense mobiliza máis de 1,3 millóns de euros en cooperación con municipios e entidades
Na súa sesión ordinaria semanal, a Xunta de Goberno da Deputación de Ourense aprobou un total de 39 asuntos que supoñen a mobilización de 1.326.763,48 euros. Deste importe, 868.614,16 euros destinaranse á cooperación con 17 municipios para a mellora de infraestruturas, obras e servizos, mentres que 458.149,32 euros asignaranse a diversas entidades.
O presidente provincial, Luis Menor, destacou a importancia do traballo dos funcionarios da Deputación, ao que atribuíu a axilidade e eficiencia administrativa que permite a mobilización semanal de fondos.
No relativo á cooperación municipal, os beneficiarios desta semana son A Arnoia, O Barco de Valdeorras, Beariz, Boborás, O Bolo, Leiro, Montederramo, Monterrei, A Peroxa, Ramirás, Rubiá, San Cibrao das Viñas, Sarreaus, Toén, Vilariño de Conso e Xunqueira de Ambía. Entre os proxectos destacados, Menor subliñou: 250.000 euros para a construción do velorio municipal de Beariz; 48.000 euros para arranxar camiños en Rubiá; 99.500 euros para ampliar o camiño Laxedo en San Cibrao das Viñas; 38.000 euros para un proxecto de dixitalización que permitirá manter os exames de conducir en O Barco de Valdeorras; e 70.000 euros para mellorar o pavimento de Ribadela en Toén.
No ámbito da cooperación con entidades, destacan os 105.000 euros para Expourense, os 100.000 euros para o Consello Regulador de Valdeorras e 35.000 euros para o Consello Regulador da Ribeira Sacra, destinados á instalación de estacións meteorolóxicas e a un programa de dixitalización. Ademais, a Asociación Provincial de Autoescolas recibirá 36.000 euros para actividades de formación, o Colexio Oficial de Enxeñeiros Técnicos Agrícolas e Peritos Agrícolas de Ourense 20.000 euros para equipamento informático, e a Asociación Provincial de Artesáns a mesma cantidade para gastos de funcionamento. Outras axudas concedéronse ao Pavillón Club de Fútbol (25.000 euros), ao Club Deportivo Atlético Arnoia (8.000 euros), a Subida a Vilar de Barrio (8.000 euros), Sacra Experience (10.000 euros), á Fundación Vicente Risco (1.500 euros), á Asociación Celanova Chea (10.000 euros), á Asociación Cultural Cocas e Danzantes de Santa Tecla (6.650 euros), á Federación de Teatro Afeccionado Galego (3.000 euros), á Asociación Xuvenil Adolfo Enríquez (2.000 euros) e á Asociación Estudiantil Auria Technologies (8.000 euros).
Así mesmo, en materia de xestión administrativa, resolveuse o concurso de axudas para festivais, ciclos e actividades culturais de 2025, cun importe total de 59.999,32 euros, destinados a dinamizar a actividade cultural na provincia.
Por último, a Xunta de Goberno aprobou unha modificación do destino asignado do Plan CooperOU a petición do Concello de Verín.