A Deputación de Ourense mobiliza máis de 260.000 euros en cooperación con varios municipios da provincia
A Xunta de Goberno da Deputación de Ourense aprobou esta semana a mobilización dunha partida de 484.096,81 euros en subvencións a diversas entidades e concellos da provincia.
Deste importe, 266.099 euros destinaranse á cooperación cos municipios de Castrelo de Miño, Entrimo, Avión, Boborás, Chandrexa de Queixa, Leiro, Paderne de Allariz, Vilar de Barrio e Riós para mellorar infraestruturas e estradas, recuperar elementos etnográficos, optimizar servizos básicos como o abastecemento de augas e o saneamento, e dotar de novas infraestruturas deportivas a estas localidades.
As axudas tamén teñen un marcado carácter social. Esta semana asignáronse 217.997,7 euros a diferentes entidades e asociacións. Entre elas, destacan os 50.000 euros para a Asociación Down Ourense destinados á mellora da súa sede, e os 60.000 euros a Aspanas para acometer reformas nos centros desta asociación de pais de persoas con discapacidade intelectual.
Outras subvencións relevantes inclúen os 25.000 euros ás protectoras de animais; 20.000 euros á Ruta do Viño do Ribeiro para apoiar actividades de promoción; 30.000 euros á Comunidade de Montes de Quinxo para un proxecto de canalización de auga; 8.000 euros ás asociacións de veciños de Vilanova dos Infantes e 22.000 euros á de Bentraces; así como 3.000 euros para a organización dunha carreira solidaria contra o cancro de páncreas en Vilamartín de Valdeorras.