A Deputación de Ourense pon en valor o termalismo como motor turístico na provincia
A provincia de Ourense acolle esta semana o ThermEcoWat Ourense–Laias Workshop, un encontro transnacional centrado na xestión das augas termais e das enerxías renovables. Durante tres días, científicos, técnicos especializados e representantes públicos de España e Portugal visitarán lugares emblemáticos como A Chavasqueira, As Burgas e o Campus de Ourense.
O evento, que se celebra no balneario de Laias, está coordinado pola Deputación Provincial de Ourense dentro do proxecto europeo ThermEcoWat, financiado polo programa Interreg Sudoe 2021-2027. «Ourense tiene en los balnearios termales uno de sus mayores activos naturales y económicos. Este encuentro refuerza nuestra vocación europea y nuestro compromiso con un modelo de desarrollo sostenible, basado en la innovación, las energías limpias y la gestión responsable del agua», destacou o deputado provincial de Innovación, Jorge Pumar, durante a presentación.
ThermEcoWat ten como obxectivo preservar o patrimonio termal do suroeste de Europa e desenvolver estratexias de adaptación ao cambio climático. O consorcio internacional está formado por institucións de primeiro nivel, entre elas o Bureau de Recherches Géologiques et Minières (BRGM) e Thermauvergne de Francia, o Institut Cartogràfic i Geològic de Catalunya (ICGC), o Centro Nacional IGME-CSIC, a Universidade de Vigo, o Ajuntament de Caldes de Montbui e as Termas de São Pedro do Sul en Portugal.
As conclusións do taller servirán para crear novas ferramentas de gobernanza colaborativa, que permitan anticipar os efectos do cambio climático e fomentar o uso sostible dos recursos térmicos en pequenas comunidades do suroeste europeo.