A Deputación de Ourense presenta en Madrid o seu proxecto de Padrón On-line
A Deputación de Ourense deu a coñecer o seu proxecto de Padrón On-line na XVI edición do Congreso Nacional de Innovación e Servizos Públicos (CNIS), que se celebra estes días en La Nave, o centro de innovación máis grande de Madrid.
O director da Área de Transparencia e Goberno Aberto, Marcos Valiño, explicou os detalles desta iniciativa de transformación dixital que a institución provincial está a desenvolver para os concellos ourensáns.
Acompañado por responsables do Instituto Nacional de Estatística, Valiño destacou que a Deputación lidera o proxecto apoiándose en dúas premisas fundamentais: “os ourensáns como verdadeiros protagonistas do mesmo e a interoperabilidade e colaboración entre administracións”.
O proxecto Padrón On-line prevese que estea finalizado ao longo do mes de marzo para os 92 concellos da provincia, coa validación do Instituto Nacional de Estatística, e reducindo ao 50% o orzamento inicial previsto. Ademais, a Deputación ofrecerá soporte e mantemento gratuíto da solución aos concellos durante os próximos tres anos para acompañalos na súa transformación dixital.
O proxecto conta cun financiamento dos fondos NextGeneration da UE, cun orzamento de 1.330.000 euros, e desenvólvese en colaboración co Ministerio de Política Territorial e Memoria Democrática, co Instituto Nacional de Estatística, coa Dirección Xeral de Catastro e cos 92 concellos da provincia de Ourense.
O CNIS é un dos encontros de referencia en innovación pública, que reúne a máis dun millar de responsables públicos e expertos en transformación dixital, ofrecendo un espazo clave para compartir proxectos, ideas e solucións que están a marcar o futuro das administracións.