A Deputación de Ourense reforzará o seu compromiso coa mellora dos rueiros municipais
O presidente da Deputación de Ourense, Luis Menor, reuniuse con representantes sindicais de Correos en Ourense para abordar a situación do servizo postal no ámbito rural da provincia, facendo especial fincapé na actualización dos rueiros municipais como clave para mellorar a distribución.
Durante o encontro, os sindicatos Javier Carballo (UGT) e Paz Saavedra (CCOO) alertaron sobre a perda progresiva dos servizos postais, especialmente na zona rural, onde non se garante o reparto cinco días á semana, e sinalaron que as oficinas e recursos están a trasladarse ás áreas urbanas, o que afecta negativamente á cobertura.
Para facer fronte a esta problemática, a Deputación puxo en marcha unha liña de axudas dotada con 100.000 euros destinada aos concellos para actualizar os seus rueiros e xeolocalizar vivendas. Esta iniciativa busca facilitar o traballo diario do persoal de reparto, garantindo unha prestación máis eficiente e organizada dos servizos públicos no rural.
Luis Menor destacou que, dada a alta demanda por parte dos municipios, esta liña de apoio continuará nos próximos anos para que todos os concellos da provincia poidan contar cun rueiro actualizado. “Este é un paso fundamental para mellorar a atención ás persoas que viven no rural e evitar que sigan sufrindo recortes no servizo postal”, indicou.