A Deputación de Ourense suma 87 concellos ao censo provincial de amianto e avanza na planificación da retirada
A Deputación de Ourense continúa a desenvolver o seu programa de apoio aos concellos de menos de 20.000 habitantes para elaborar un censo de instalacións e emprazamentos con amianto, unha ferramenta que busca facilitar o cumprimento da Lei 7/2022 e a obriga municipal de identificar estes materiais e planificar a súa retirada.
Segundo a información trasladada pola institución provincial, ao plan (en execución no período 2025-2027) están adheridos 87 concellos. A Deputación presta asistencia técnica e económica a través de AquaOurense, Sociedade Provincial de Augas e Medio Ambiente, e os traballos arrancaron en xuño, cun avance que xa se considera significativo.
Ata o momento, 35 concellos superaron a fase inicial, na que se realiza un censo preliminar e a teledetección de cubertas de fibrocemento. Ese labor permitiu abranguer arredor de 49.000 edificacións e identificar unhas 16.500 cubertas. Ademais, outros 26 concellos están na fase intermedia, centrada no traballo de campo e no cribado do censo, con preto de 700 preinspeccións visuais en inmobles públicos municipais. A Deputación indica que 18 concellos avanzan xa na fase final, na que se elabora a documentación definitiva e se propón un calendario para a retirada do amianto.
O programa complétase cun visor web chamado LocAm, que permitirá aos concellos dispoñer dun mapa interactivo coas edificacións clasificadas segundo o risco, para apoiar a análise técnica e a toma de decisións.
Dende a Área de Medio Ambiente da Deputación subliñan que este plan pretende ser un apoio clave, especialmente para os municipios máis pequenos, para reforzar a protección da saúde pública e avanzar nunha xestión máis segura das infraestruturas municipais.