“A nosa achega sería humilde fronte á gran cantidade de necesidades destas persoas”, sinalou o presidente provincial, que tamén pediu o apoio de máis administracións e vilas termais para poder ofertar un volume suficiente de prazas termais “e así chegar a máis concellos valencianos e a máis persoas”.
Luis Menor sostén que “podemos e debemos facer este esforzo”, que, segundo engadiu, tamén contribuiría a situar os balnearios como referentes non só no ámbito da saúde, senón tamén no da solidariedade.
A Deputación de Ourense, a través da Área de Benestar, xa mantivo contacto con algúns dos municipios máis afectados da Comunidade Valenciana, que están valorando a proposta. A través dos seus servizos sociais municipais, un determinado número de persoas tería a oportunidade de desconectar da dura realidade que están a vivir grazas a unha estancia nun balneario, contribuíndo á súa recuperación anímica e física, sempre acompañadas por persoal especializado.
Tras presentar esta proposta de saúde física e mental, que xa conta co respaldo de varios balnearios de Ourense, os concellos de Archena e Caldes de Malavella (Girona) sumáronse ao proxecto durante o Congreso.
Ademais, a iniciativa foi presentada a Renfe, dado que o tren sería o medio de transporte preferente cara aos municipios con instalacións termais. Tamén se trasladou a idea á Rede de Cidades Saudables da FEMP.
Modelo de cooperación público-privada co sector termal
Xunto con esta proposta, durante a súa intervención no Congreso Internacional de Termalismo, Luis Menor explicou o modelo que está a impulsar a Deputación de Ourense neste ámbito, apostando por “establecer unha verdadeira e duradeira cooperación público-privada con todo o sector termal en cada territorio”.
O presidente provincial destacou o apoio público da Deputación de Ourense ao fomento do termalismo en dez puntos clave. O primeiro deles é un uso funcional e equilibrado dos balnearios con dúas vertentes: turística e como recurso social e de saúde.
Sinalou como esencial o desenvolvemento “planificado, estruturado e plurianual” das políticas locais de apoio ao termalismo, subliñando que un alicerce central do modelo ourensán é a axuda pública en forma de subvención ás persoas.
Ademais, insistiu en que os balnearios deben ser considerados polas administracións públicas como “entidades colaboradoras”, implementando instrumentos xurídicos axeitados, como bases reguladoras, para a xestión das axudas.
Defendeu un sistema de xestión de axudas totalmente dixital, a promoción do transporte aos balnearios preferentemente en tren combinado con outros medios, o apoio á sustentabilidade ambiental dos balnearios, unha avaliación continua das iniciativas e a personalización do termalismo con programas dirixidos a colectivos vulnerables en termos de saúde física e mental.
Premio para o Campus da Auga de Ourense
Luis Menor tamén tivo ocasión de felicitar o equipo de investigación do Campus da Auga da Universidade de Vigo, situado en Ourense, que recibiu o premio á mellor comunicación científica do Congreso pola súa proposta de creación dun Hub Termal para reducir o custo enerxético nos balnearios, unha iniciativa na que tamén colabora a Deputación de Ourense.
