A Deputación reforza o orzamento do Consorcio para a Prestación do Servizo de Bombeiros e Rescate con 505.000 euros
A Deputación de Ourense aprobou recentemente unha modificación do crédito orzamentario do Consorcio para a Prestación do Servizo de Bombeiros e Rescate, por un importe de 505.000 euros. Este orzamento destinarase a gastos xerais do consorcio, incluíndo melloras en instalacións, maquinaria e programas de xestión de emerxencias.
Durante a mesma sesión tamén se abordaron cambios na ordenanza fiscal do servizo de recollida, transporte e tratamento de residuos, que coa incorporación do concello de Cortegada alcanza xa 60 municipios afiliados. Entre as novidades, modifícase a periodicidade do cobro, que pasará de catro recibos trimestrais a un único recibo anual, mantendo a opción de fraccionar o pagamento.
Así mesmo, establécese que o prazo para solicitar a tarifa reducida será antes do 1 de xaneiro, aínda que esta medida non entrará en vigor ata o 1 de xaneiro de 2027. Tamén se introduciron axustes na ordenanza do servizo de recadación para adaptala a cambios na Lei Xeral Tributaria e á delegación de poderes do Concello de Cortegada.