A DGT pon en marcha en cinco concellos ourensáns unha campaña especial contra as distraccións ao volante
A Dirección Xeral de Tráfico (DGT) puxo en marcha unha campaña especial para reducir as distraccións ao volante, que se desenvolve desde o luns 6 de outubro e se prolongará ata o próximo domingo. Esta iniciativa busca concienciar aos condutores sobre os riscos que supón manipular dispositivos electrónicos, consultar documentación ou desatender o tráfico mentres se conduce, factores que se converteron na principal causa contribuínte de accidentes nas estradas desde 2017.
A campaña realízase tanto en estradas como en entornos urbanos, grazas á colaboración da Agrupación de Tráfico da Garda Civil e das Policías Locais dos municipios que se suman á iniciativa. Na provincia de Ourense participan os municipios de Ourense, O Barco, Celanova, Xinzo de Limia e A Pobra de Trives. Durante estes días, os axentes intensificarán a vixilancia e a concienciación para reducir os riscos asociados ás distraccións ao volante, reforzando a educación viaria e promovendo a seguridade de todos os usuarios da vía.
O subdelegado do Goberno en Ourense, Eladio Santos, participou na presentación da campaña e visitou un control na N-525, no municipio de Coles, acompañado polo xefe provincial de Tráfico, David Llorente; a subxefa provincial, Andrea Conde; e o tenente da Subsección de Tráfico da Garda Civil, Eloy Silvarino. Santos recordou que "cada vez que un condutor decide manipular un dispositivo e non presta atención aos mandos do vehículo, pon en perigo a súa vida e a das outras persoas".
O subdelegado tamén indicou que, no que vai de ano, xa se deduciron 2.426 puntos na provincia polo uso de teléfonos móbiles ao volante. Recalcou que "independentemente das sancións, debemos concienciar á cidadanía, xa que usar o teléfono ao volante provoca distraccións e un risco similar ao de conducir baixo os efectos do alcohol ou as drogas". Actualmente, a normativa establece que o uso do móbil mentres se conduce supón a perda de seis puntos e unha multa de 200 euros, e noutros casos, tres puntos.
Santos tamén fixo fincapé na importancia de manter a atención constante ao volante, especialmente en zonas con fauna salvaxe, e de manexar o vehículo con ambas mans para minimizar o risco de accidentes.
Na campaña do ano pasado, celebrada entre o 7 e o 13 de outubro, os axentes da Agrupación de Tráfico da Garda Civil controlaron 13.542 vehículos nas estradas ourensás e denunciaron a 217 persoas por distraccións ao volante.