A Fundación Vicente Risco adiantouse á celebración das Letras Galegas cun acto para homenaxear ás cantareiras
O sábado 10 de maio a Fundación Vicente Risco celebrou o Día das Letras Galegas na súa sede de Allariz cun acto que estivo presentado por Xosé Manoel Fírvida, tesoureiro da Fundación Vicente Risco, e que contou coa intervención de Noe, da Arca da Noe (Vilar de Santos), Lois Pardo, xestor cultural, e Xulio Pérez Pereiras, activista cultural do Courel e Allariz. O acto rematou coa actuación do grupo de cantareiras da Arca da Noe “As Xingras”.
Ademais, o venres, a Fundación acolleu unha conferencia para poñer en valor a figura de Cruz Risco que estivo dirixida por Xaime Varela. Grazas ao seu traballo, os asistentes puideron coñecer máis sobre Cruz Martínez-Risco (1943-1992), pioneira do cinema galego. No acto participaron ademais Maribel Outeiriño e Xosé Manoel Rodríguez.