A II Feira Educativa de Ourense botou o peche con máis de 5.000 participantes
A segunda edición da Feira da Educación de Ourense concluíu hoxe consolidada como unha cita imprescindible para centros educativos, profesionais, alumnado e familias, tras superar todas as expectativas cos máis de 5.000 visitantes rexistrados durante as dúas xornadas. O evento, organizado de maneira conxunta pola Xunta de Galicia, a Deputación Provincial de Ourense e Expourense, contou coa participación de 55 expositores e evidenciou un notable crecemento tanto en superficie expositiva como en asistencia, o que leva aos organizadores a pensar xa na terceira edición.
Ao longo desta segunda xornada, alumnado de Bacharelato e Formación Profesional de distintos centros educativos da provincia puido coñecer centos de opcións para continuar a súa formación académica, con propostas adaptadas a diversos intereses e recursos. A feira destacou a excelencia da oferta educativa pública galega, ao tempo que tamén serviu como escaparate para universidades e centros educativos, públicos e privados, do resto de España. En Galicia, subliñaron os organizadores, o modelo educativo garante gratuítas formacións que van dende a gardería ata a Universidade, situándoa entre as poucas comunidades coas mesmas condicións.
O conselleiro de Educación, Ciencia, Universidade e Formación Profesional da Xunta de Galicia, Román Rodríguez, visitou esta mañá a feira acompañado polo deputado provincial Rosendo Fernández. Durante o percorrido, fixeron parada no área de Formación Profesional de Galicia, que se revelou como o stand máis visitado, debido a que a comunidade galega é a segunda de España en alumnado matriculado en FP en relación á poboación escolar, e o 85% destes estudantes cursa os seus estudos en centros públicos. Na actualidade, dous de cada cinco alumnos que rematan a Educación Secundaria Obriga elixen a FP e o 26,6% dos galegos conta cun título de Formación Profesional.
Durante a súa visita, Román Rodríguez destacou que a feira “é unha oportunidade para mostrar o traballo innovador que se está a levar a cabo nas aulas e para dar a coñecer ao alumnado as diversas opcións para o seu futuro académico e profesional”. O conselleiro tamén resaltou o valor destes eventos como espazos de colaboración, onde administracións, centros educativos e organizacións diversas poden intercambiar experiencias e coñecementos dentro da comunidade educativa.
A II Feira da Educación foi, logo de Previsel, a segunda cita do calendario de Expourense para 2026, que continuará a fin de semana do 11 e 12 de abril coa celebración do 4º Salón do Vehículo Clásico de Ourense.