A Novena á Virxe dos Milagres reunirá milleiros de fieis en Baños de Molgas
O Santuario dos Milagres, en Baños de Molgas, volverá converterse un ano máis no epicentro da devoción mariana en Galicia coa celebración da tradicional Novena á Virxe dos Milagres, que se desenvolverá entre o 30 de agosto e o 8 de setembro de 2025.
Durante estes días programaranse numerosas misas diarias en distintos horarios, así como celebracións especiais que terán o seu punto culminante o luns 8 de setembro, coa Festa Solemne ás 12:00 horas, seguida dunha procesión coa imaxe da Virxe.
A novena estará predicada polo Rvdmo. P. Rolando Gutiérrez, C.M., Visitador Provincial dos Misioneiros Paúles de Costa Rica, que guiará espiritualmente aos participantes.
Cada xornada terá unha intención específica, que abranguen dende a oración polos emigrantes e inmigrantes, ata a lembranza polos anciáns, os enfermos, as familias ou a Diocese de Ourense.
Ademais das celebracións litúrxicas, o programa inclúe o Rosario de Aurora polas parroquias da contorna, a Peregrinación dos Anciáns e Enfermos o 1 de setembro, a Xornada da Pastoral Penitenciaria o día 2, a Ofrenda da Xuventude o día 6 ou a Peregrinación da Catequese o 7 de setembro.
O santuario reforzará tamén os servizos de confesión, que estarán dispoñibles diariamente en horario de mañá e tarde.
Co lema “Con María, levantémonos e camiñemos”, a novena convértese nun encontro de fe e tradición que cada ano congrega milleiros de devotos chegados de toda Galicia e doutros puntos de España.