A Peroxa súmase ao programa da Xunta para construír 7 vivendas protexidas en solo municipal
O Concello da Peroxa asinou un convenio coa Xunta de Galicia para participar no programa que mobiliza solos de titularidade municipal destinados á construción de vivendas protexidas. Esta iniciativa, impulsada pola Consellería de Vivenda e Planificación de Infraestruturas, busca facilitar o acceso a vivendas asequibles mediante o uso de terreos municipais.
O acordo, asinado o 2 de decembro en Santiago de Compostela pola conselleira María M. Allegue e o alcalde Manuel Seoane Rodríguez, contempla a posta a disposición de dúas parcelas contiguas situadas no núcleo urbano da Peroxa, cunha superficie total de 1.845 metros cadrados. Estes terreos permitirán a construción de polo menos sete vivendas unifamiliares, principalmente en réxime de pareado.
A Xunta, a través do Instituto Galego de Vivenda e Solo (IGVS), encargarse de xestionar todo o proceso técnico e administrativo, que inclúe a publicación dos solos dispoñibles, a elaboración dos prazos para concurso público, a valoración das ofertas e a organización da mesa de contratación. O Concello só deberá achegar a información sobre as parcelas e ditar a resolución final de adxudicación.
Este convenio é o sétimo deste tipo que a Xunta asina con municipios galegos, tras os acordos con As Pontes de García Rodríguez, A Arnoia, Friol, Valdoviño, O Valadouro e Ordes. A conselleira Allegue destacou a importancia destas colaboracións para axilizar a construción de vivendas protexidas en solo público, tanto en réxime de venda como de aluguer.
A Xunta continúa en contacto con outras administracións locais interesadas en sumarse a esta iniciativa, cuxo prazo para adherirse permanece aberto sen data límite.