A primeira planta de Piñor volve a funcionar como área de hospitalización do CHUO
A primeira planta de Piñor volve a funcionar como área de hospitalización tras o traslado dos primeiros doce pacientes ás unidades de Paliativos e de Coidados Mínimos, un operativo que comezou no día de onte e contou coa colaboración da Garda Civil de Tráfico, Corpo Nacional e Policía Local de Ourense, para acompañar ás ambulancias, ademais de preto dunha vintena de profesionais do Hospital Universitario de Ourense.
O traslado concluíu sen incidencias, dándose por aberta esta área de hospitalización incluída nos sucesivos plans de continxencia, e que xa prestou un servizo fundamental durante a primeira onda da pandemia de COVID, na que se atenderon entre abril e maio de 2020 ao redor de 80 pacientes, polo que nesta reapertura tan só foi preciso completar o seu equipamento médico.
A programación de ambas unidades contempla unha dotación de persoal de enfermería de máis de trinta profesionais, entre enfermeiras e técnicos de coidados auxiliares (TCAE), aos que se sumarán celadores e persoal médico. A Unidade de Hospitalización a Domicilio (HADO) -que tamén traslada a súa base a Piñor- encargarase do seguimento médico de Coidados Paliativos, xunto ao equipo de enfermería habitual, sendo responsable o Servizo de Medicina Interna da Unidade de Coidados Mínimos.
Ao longo dos próximos días procederase ao traslado progresivo dos pacientes susceptibles de ingreso nesta área, o que permitirá avanzar no baleirado das unidades de hospitalización do Materno-Infantil, así como comezar os traballos revisión dos falsos teitos no Materno e de adaptación da primeira planta do Cristal, que acollerá pediatría. Atendendo á capacidade máxima dos novos espazos, Coidados Paliativos conta con 9 camas e a de Coidados Mínimos con 29.