A Subdelegación do Goberno informa sobre os cambios do novo Regulamento de Estranxeiría
O subdelegado do Goberno en Ourense, Eladio Santos, celebrou hoxe que o novo Regulamento de Estranxeiría, que entrou en vigor o 20 de maio, reduce trámites administrativos para residir e traballar en España e busca garantir os dereitos e liberdades das persoas migrantes. Fíxoo durante a presentación dunha xornada sobre a reforma da Rede Emprega-Nós de Ourense.
Despois da inauguración, na Biblioteca Pública de Ourense Nós, a xefa da Oficina de Estranxeiría da Subdelegación do Goberno, Josefina Rodríguez Durán, ofreceu un relatorio sobre os cambios que trae o novo Regulamento, ante membros da Rede Emprega-Nós, formada por persoal técnico de 18 entidades do terceiro sector.
Aos presentes se dirixiu o subdelegado para agradecerlles o traballo que fan polas persoas en situación de vulnerabilidade. “Os que atendedes a inmigrantes debedes saber que este Regulamento garante a seguridade xurídica destas persoas a través de tres eixos: a familia, o traballo e a formación”, destacou.
Tamén deu as grazas ás funcionarias e funcionarios da Oficina de Estranxería da Subdelegación do Goberno, “que se están a adaptar á norma con profesionalidade e rigorosidade”. “O seu labor, cun 100% de solicitudes resoltas, fai posible que a xente estranxeira poida vir ao noso país a vivir con dignidade e traballar legalmente”, remarcou.
Ademais, Eladio Santos explicou que a reforma pretende adecuar a normativa á situación migratoria actual. “Búscase dar resposta ás necesidades das persoas inmigrantes, á situación demográfica da nosa provincia e ao actual mercado laboral”, sinalou.